தீபாவளி பண்டிகை நெருங்கும் நிலையில், குஜராத் மாநிலம் அகமதாபாத்தில் வாகன ஓட்டிகளுக்குக் கூடுதல் செலவை ஏற்படுத்தும் வகையில் சிஎன்ஜி (CNG) விலை உயர்ந்துள்ளது. அதானி கேஸ் நிறுவனம் ஒரு கிலோ சிஎன்ஜி விலையை ரூ.4.45 உயர்த்தியுள்ளது. இதனால், ஏற்கெனவே அத்தியாவசியப் பொருட்களின் விலை உயர்வால் சிரமப்படும் பொதுமக்களுடன், ஆட்டோ ஓட்டுநர்களும் கூடுதல் நிதிச் சுமையைச் சந்திக்க வேண்டிய நிலை ஏற்பட்டுள்ளது.
இந்த விலை உயர்வுக்குப் பிறகு, அகமதாபாத்தில் ஒரு கிலோ சிஎன்ஜியின் விலை ரூ.98.47 ஆக அதிகரித்துள்ளது. இதற்கு முன்பு ஆகஸ்ட் மாதத்திலும் அதானி கேஸ் நிறுவனம் சிஎன்ஜி விலையை ரூ.4 உயர்த்தியிருந்தது. அப்போது ஒரு கிலோவின் விலை ரூ.94.20 ஆக இருந்தது. அடுத்தடுத்து ஏற்பட்டுள்ள விலை உயர்வு, தினசரி வாகனங்களைப் பயன்படுத்துவோரின் செலவுகளை அதிகரித்துள்ளது.
குறிப்பாக, சிஎன்ஜியை எரிபொருளாகப் பயன்படுத்தும் ஆட்டோ ஓட்டுநர்கள் இந்த உயர்வால் கடுமையாகப் பாதிக்கப்பட்டுள்ளனர். எரிவாயு விலை தொடர்ந்து அதிகரிக்கும் நிலையில், அதற்கேற்ப ஆட்டோ கட்டணத்தை உயர்த்த போக்குவரத்துத் துறை அனுமதி வழங்கவில்லை என்பது அவர்களின் முக்கியக் குறையாக உள்ளது. ஏற்கெனவே கட்டண நிர்ணயம் மற்றும் இணையவழி வாடகை வாகனச் சேவைகளின் போட்டி தொடர்பாக ஆட்டோ ஓட்டுநர்கள் போராட்டங்களில் ஈடுபட்டுள்ளனர். இந்நிலையில், பண்டிகைக் காலத்தில் ஏற்பட்டுள்ள புதிய விலை உயர்வு அவர்களின் வருமானத்தில் மேலும் பாதிப்பை ஏற்படுத்தியுள்ளது.
சிஎன்ஜி விலையை உயர்த்தியதற்கான காரணம் குறித்து விளக்கமளித்த அதானி டோட்டல் கேஸ் நிறுவனத்தின் (ATGL) செய்தித் தொடர்பாளர், இயற்கை எரிவாயுவைக் கொள்முதல் செய்வதற்கான செலவு கணிசமாக அதிகரித்துள்ளதாகத் தெரிவித்தார். உள்நாட்டில் எரிவாயு கிடைப்பது குறைந்திருப்பது, விநியோகத்தில் ஏற்பட்டுள்ள கட்டுப்பாடுகள், சர்வதேச எரிவாயு விலை உயர்வு மற்றும் புவிசார் அரசியல் பதற்றங்கள் ஆகியவை செலவு அதிகரிப்புக்குக் காரணங்களாக உள்ளன.
இந்தச் சூழலிலும், வாடிக்கையாளர்களுக்கு ஏற்படும் பாதிப்பைக் குறைக்க நிறுவனம் முயற்சி செய்து வருவதாகவும், குறைந்த செலவிலான சுற்றுச்சூழலுக்கு உகந்த எரிபொருளான சிஎன்ஜியின் விநியோகம் தடையின்றித் தொடர நடவடிக்கை எடுத்து வருவதாகவும் நிறுவனம் விளக்கமளித்துள்ளது.
Also Read: “நானும் ரிஷிகாந்தும் ஒரே ஆள்தான்!” – நடிகர் மணிகண்டன் சொன்ன அந்த விஷயம்!
