பெண்கள் மற்றும் சிறுமிகளுக்கு மனிதர்களால் மட்டுமல்ல, இனி மனித உருவ ரோபோக்களாலும் ஆபத்து ஏற்படுமா என்ற கேள்வியை எழுப்பியுள்ளது ஜெர்மனியில் நடந்துள்ள ஒரு சம்பவம். 16 வயது சிறுமியிடம் மனித உருவ ரோபோ ஒன்று பாலியல் அத்துமீறலில் ஈடுபட்டதாகப் புகார் எழுந்ததைத் தொடர்ந்து, அந்த ரோபோவை காவல்துறையினர் பறிமுதல் செய்துள்ளனர். செயற்கை நுண்ணறிவு தொழில்நுட்பம் வேகமாக வளர்ந்து வரும் நிலையில், ரோபோக்களின் செயல்பாடுகள் மற்றும் அவற்றின் பாதுகாப்பு குறித்த விவாதமும் தீவிரமடைந்துள்ளது.
ஜெர்மனியின் கொலோன் நகரில் உள்ள உணவகம் ஒன்றின் வெளியே கடந்த 11ஆம் தேதி நள்ளிரவில் இந்தச் சம்பவம் நடந்ததாகக் கூறப்படுகிறது. சீனாவில் தயாரிக்கப்பட்ட சுமார் 4 அடி உயரமுள்ள ‘Unitree R1 Air’ என்ற மனித உருவ ரோபோவுக்கு அயர்ன் மேன் உடை அணிவிக்கப்பட்டிருந்தது. அந்த ரோபோ 16 வயது சிறுமியிடம் தகாத வகையில் நடந்துகொண்டதாகப் புகார் எழுந்துள்ளது.
இந்தச் சம்பவத்தை ரோபோவின் 16 வயது உரிமையாளரும் அவரது 19 வயது நண்பரும் நேரலையாக இணையத்தில் ஒளிபரப்பியுள்ளனர். இதையடுத்து, காரின் பின்புறத்தில் மறைத்து வைக்கப்பட்டிருந்த ரோபோவையும் இரண்டு செல்போன்களையும் காவல்துறையினர் பறிமுதல் செய்துள்ளனர்.
ரோபோவின் செயல்பாடு மனிதரால் நேரடியாகக் கட்டுப்படுத்தப்பட்டதா, முன்கூட்டியே நிரலாக்கம் செய்யப்பட்டதா அல்லது தொழில்நுட்பக் கோளாறால் ஏற்பட்டதா என்பது குறித்து விசாரணை நடைபெற்று வருகிறது. விசாரணையின் முடிவில்தான் சம்பவத்தின் பின்னணி குறித்த முழுமையான விவரங்கள் தெரியவரும்.
ரோபோக்களின் செயல்பாடுகள் தொடர்பான சர்ச்சைகள் இதற்கு முன்பும் எழுந்துள்ளன. 2016ஆம் ஆண்டு அமெரிக்காவின் கலிபோர்னியாவில் பாதுகாப்புப் பணியில் ஈடுபட்டிருந்த ரோபோ ஒன்று சிறுவனைத் தள்ளிய சம்பவம் கவனத்தைப் பெற்றது. 2024ஆம் ஆண்டு சவூதி அரேபியாவில் நடைபெற்ற நிகழ்ச்சியின்போது, ரோபோ ஒன்று பெண் செய்தியாளரிடம் தகாத முறையில் நடந்துகொண்டதாகச் சர்ச்சை எழுந்தது. 2025ஆம் ஆண்டு செஸ் விளையாட்டின்போது ரோபோ ஒன்று சிறுவனின் விரலைக் காயப்படுத்திய சம்பவமும் பேசப்பட்டது.
எதிர்காலத்தில் முதியோர் பராமரிப்பு உள்ளிட்ட பணிகளுக்குப் பயன்படுத்தப்படும் ரோபோக்கள் ஹேக்கிங் மூலம் தவறாகப் பயன்படுத்தப்படுவதற்கான அபாயம் இருப்பதாகவும் பாதுகாப்பு நிபுணர்கள் எச்சரித்துள்ளனர். மனிதர்களின் அன்றாட வாழ்க்கையில் ரோபோக்களின் பயன்பாடு அதிகரிக்கும் சூழலில், அவற்றின் பாதுகாப்பு மற்றும் கண்காணிப்பு குறித்த கவலைகளும் அதிகரித்துள்ளன.
ஒரு ரோபோவின் செயல்பாட்டால் பாதிப்பு ஏற்பட்டால் அதற்கான பொறுப்பை யார் ஏற்க வேண்டும் என்பதும் முக்கியமான கேள்வியாக உள்ளது. ரோபோக்களுக்கு மனிதர்களைப் போன்ற தனிப்பட்ட சட்ட அங்கீகாரம் பொதுவாக வழங்கப்படுவதில்லை. ரோபோவை ஒருவர் வேண்டுமென்றே தவறாக இயக்கியிருந்தால், சம்பந்தப்பட்ட நபர் மீது சட்ட நடவடிக்கை எடுக்கப்படலாம். தொழில்நுட்பக் கோளாறு அல்லது பாதுகாப்புக் குறைபாடு காரணமாகப் பாதிப்பு ஏற்பட்டிருந்தால், தயாரிப்பு நிறுவனம் அல்லது உரிமையாளரின் பொறுப்பும் விசாரணைக்கு உட்படுத்தப்படலாம்.
ஜெர்மனியில் எழுந்துள்ள இந்தப் புகார், மனித உருவ ரோபோக்களின் பயன்பாட்டில் கடுமையான பாதுகாப்பு விதிமுறைகள், முறையான கண்காணிப்பு மற்றும் சட்டக் கட்டுப்பாடுகள் அவசியம் என்பதை மீண்டும் முன்னிறுத்தியுள்ளது.
Also Read: ஜெயிலர் 2 ரிலீஸ்.. “தலைவர் தரிசனம்”.. தனுஷ் ஒரே வரி வாழ்த்து.. சிவகார்த்திகேயன் சொன்ன அந்த விஷயம்!
