முன்னாள் அமெரிக்க துணை அதிபர் கமலா ஹாரிஸ், அமெரிக்க அதிபர் டொனால்ட் டிரம்பை கடுமையாக விமர்சித்துள்ளார். இஸ்ரேலிய பிரதமர் பெஞ்சமின் நெதன்யாகுவின் செல்வாக்கின் கீழ் அவர் ஈரானுடனான இராணுவ மோதலுக்குள் இழுக்கப்பட்டதாக அவர் குற்றம் சாட்டினார். “எப்ஸ்டீன் கோப்புகள்” தொடர்பான சர்ச்சைகளிலிருந்து கவனத்தைத் திசை திருப்புவதற்கான ஒரு பலவீனமான முயற்சி இது என்றும் கமலா ஹாரிஸ் விமர்சித்தார்..
சனிக்கிழமையன்று டெட்ராய்டில் மிச்சிகன் ஜனநாயக மகளிர் பேரவையால் ஏற்பாடு செய்யப்பட்ட ஒரு நிகழ்வில் பேசிய கமலா ஹாரிஸ், இந்த மோதல் அமெரிக்க மக்களின் விருப்பங்களைப் பிரதிபலிக்கவில்லை என்று கூறினார். அவர் இந்த நிலைமையை ஒரு தேவையற்ற போர் என்று சித்தரித்து, நிர்வாகத்தின் நோக்கங்களைக் கேள்விக்குள்ளாக்கினார்.
தனது உரையின் போது, “ஆபரேஷன் எபிக் ஃபியூரி” என்று குறிப்பிடப்படும் இந்த நடவடிக்கை, உள்நாட்டு அரசியல் பிரச்சினைகளிலிருந்து கவனத்தைத் திசை திருப்பப் பயன்படுத்தப்படுகிறது என்று ஹாரிஸ் குற்றம் சாட்டினார். தற்போதைய தலைமையை அவர் கடுமையாக விமர்சித்து, அமெரிக்க வரலாற்றில் இதுவே “மிகவும் ஊழல் நிறைந்த, இரக்கமற்ற மற்றும் திறமையற்ற” நிர்வாகம் என்று அழைத்தார்.
டிரம்பின் அதிகார அணுகுமுறை குறித்தும் ஹாரிஸ் கவலைகளை எழுப்பினார். அவர் தன் விருப்பப்படி இராணுவ பலத்தைப் பயன்படுத்தி வலிமையை வெளிப்படுத்த நோக்கம் கொண்டுள்ளார் என்று குறிப்பிட்டார். அவரது நடவடிக்கைகள், நீண்டகால அமெரிக்க வெளியுறவுக் கொள்கை மரபுகளிலிருந்து ஒரு பெரிய விலகலைக் குறிக்கின்றன என்று அவர் தெரிவித்தார்..
மேலும் “இரண்டாம் உலகப் போருக்குப் பிறகு, நமது கூட்டணிகளையும் நட்புறவுகளையும் பேணி வளர்க்கும் அமெரிக்காவின் பொறுப்பைக் கைவிட்ட முதல் அமெரிக்க ஜனாதிபதி டிரம்ப் ஆவார். அவரது தலைமை, அமெரிக்கா மீதான சர்வதேச நம்பிக்கையை பலவீனப்படுத்தியுள்ளது..” என்றும் அவர் மேலும் கூறினார்.
மேலும், நிர்வாகம் உலகளாவிய தரநிலைகளைப் புறக்கணித்துள்ளது என்றும், “இறையாண்மை மற்றும் பிராந்திய ஒருமைப்பாடு போன்ற சர்வதேச விதிகள் மற்றும் நெறிமுறைகளை நிலைநிறுத்துவதன் முக்கியத்துவத்தை பாசாங்கு கூட செய்யாமல், உண்மையில் நிராகரித்த முதல் தலைவர் டிரம்ப் தான்” என்றும் அவர் கூறினார்.
இத்தகைய நடவடிக்கைகள், அமெரிக்காவை அதன் நட்பு நாடுகளுக்கு நம்பகத்தன்மையற்றதாகக் காட்டுவதோடு, அதன் உலகளாவிய செல்வாக்கையும் குறைத்துள்ளன என்று ஹாரிஸ் எச்சரித்தார்.
வெளியுறவுக் கொள்கை மட்டுமின்றி, பொருளாதாரம், சுகாதாரம் மற்றும் இனப்பெருக்க உரிமைகள் உள்ளிட்ட உள்நாட்டுப் பிரச்சினைகள் குறித்தும் கமலா ஹாரிஸ் பேசினார். அரசியலைப் பொறுத்தவரை, நவம்பரில் நடைபெறவிருக்கும் இடைக்காலத் தேர்தல்களில் ஜனநாயகக் கட்சி வெற்றி பெறும் என்று நம்புவதாகக் கூறி, அக்கட்சியின் வெற்றி வாய்ப்புகள் குறித்து அவர் நம்பிக்கை தெரிவித்தார்.
Read More : பின்விளைவுகளை சந்திக்க நேரிடும்.. எண்ணெய் கப்பல் மீது தாக்குதல்.. ஈரானுக்கு இந்தியா எச்சரிக்கை..!
