இந்தியாவில் கொண்டாடப்படும் பண்டிகைகள் மக்களை உற்சாகப்படுத்துவதோடு மட்டுமல்லாமல், நாட்டின் பொருளாதாரத்தை மிகப்பெரிய அளவில் உயர்த்தும் வல்லமை பெற்றவை என்பது மீண்டும் நிரூபணமாகியுள்ளது. தீபாவளி, தசரா, பொங்கல், ஓணம் மற்றும் பைசாக்கி போன்ற பண்டிகைகள் மக்களின் மன அழுத்தத்தைக் குறைத்து, சமூகப் பிணைப்பை வலுப்படுத்துவதுடன், வர்த்தகத் துறையிலும் புதிய மைல்கற்களை உருவாக்கி வருகின்றன.
பண்டிகைகள் வெறும் கொண்டாட்டங்கள் மட்டுமல்ல; அவை மன ரீதியான நன்மைகளையும் வழங்குகின்றன. குடும்பத்தினருடனும் நண்பர்களுடனும் ஒன்று கூடும்போது தனிமை உணர்வு குறைந்து, உணர்ச்சி ரீதியான வலிமை அதிகரிக்கிறது. அன்றாட வேலைப் பளு மற்றும் சவால்களில் இருந்து விடுவித்து, மூளையின் மகிழ்ச்சி ஹார்மோன்களை தூண்டுகிறது.பண்டிகை கால ஆடல், பாடல் மற்றும் கலை சார்ந்த நடவடிக்கைகள் சமூக பதற்றத்தைக் குறைத்து, கலாச்சார வேர்களுடன் மக்களை இணைக்கின்றன என்று மனநல ஆலோசகர் மருத்துவர் தீபிகா வர்மா தெரிவித்துள்ளார்.
பொருளாதார வளர்ச்சி மற்றும் வர்த்தக சாதனை:
பண்டிகைக் காலம் இந்திய வர்த்தகர்களுக்கும் தொழிலாளர்களுக்கும் ஒரு மிகப்பெரிய வரப்பிரசாதமாக உருவெடுத்துள்ளது. குறிப்பாக, அகில இந்திய வர்த்தகர்களின் கூட்டமைப்பு (CAIT) தரவுகளின்படி, கடந்த காலங்களில் மொத்த பண்டிகை கால வர்த்தகம் ரூ. 6.05 லட்சம் கோடியைக் தாண்டி புதிய சாதனை படைத்துள்ளது. இதில் ஈ-காமர்ஸ் எனப்படும் ஆன்லைன் விற்பனை மட்டுமே முதல் இரண்டு நாட்களில் ரூ. 24,000 கோடியை எட்டியுள்ளது.
மேலும், போக்குவரத்து, ஹோட்டல்கள் மற்றும் தளவாடங்களை உள்ளடக்கிய சேவைத் துறை மூலம் ரூ. 80,000 கோடி முதல் ரூ. 1 லட்சம் கோடி வரை வணிகம் நடைபெறும் என எதிர்பார்க்கப்படுகிறது. நுகர்வோர் வாங்கும் பொருட்களில் மளிகை மற்றும் எப்.எம்.சி.ஜி (FMCG) பொருட்கள் 12 சதவீதப் பங்கும், தங்கம் மற்றும் ஆபரணங்கள் 10 சதவீதப் பங்கும், எலக்ட்ரானிக் பொருட்கள் 8 சதவீதப் பங்கும் வகித்து சந்தையை உத்வேகத்துடன் இயக்கி வருவது குறிப்பிடத்தக்கது.
பண்டிகை கால நுகர்வோர் தேவையின் உச்சக்கட்டமாக, இந்தியாவின் மிகப்பெரிய கார் தயாரிப்பு நிறுவனமான மாருதி சுசுகி ஒரே நாளில் 14,000 கார்களை விற்பனை செய்து சாதனை படைத்துள்ளது.
தங்கத்தின் விலை கடந்த சில மாதங்களாக கட்டுப்படியாகக்கூடிய அளவில் இருப்பதால், நகை விற்பனை இந்த பண்டிகைக் காலத்தில் புதிய உச்சத்தைத் தொடும் என அனைத்திந்திய நகை மற்றும் தங்கக் கூட்டமைப்பு எதிர்பார்ப்பு தெரிவித்துள்ளது.
அதேபோல், போக்குவரத்து, தளவாடங்கள், அலங்காரம், ஹோட்டல்கள் மற்றும் நிகழ்வு மேலாண்மை போன்ற சேவைத் துறைகள் மூலம் பல லட்சம் தற்காலிக வேலைவாய்ப்புகள் உருவாக்கப்பட்டு, நாட்டின் உள்நாட்டு உற்பத்தி மற்றும் வளர்ச்சி மேலும் வலுவடைந்து வருகிறது.
