அமெரிக்க அதிபர் டொனால்ட் டிரம்ப் மீண்டும் பதவியேற்றதிலிருந்து, அவரது நிர்வாகத்திற்கு பாகிஸ்தான் மற்றும் அதன் தலைவர்களுடன், குறிப்பாக ஃபீல்ட் மார்ஷல் ஆசிம் முனீருடன், இருந்த நெருக்கம் பெருமளவில் அதிகரித்துள்ளது. டிரம்ப் பல சந்தர்ப்பங்களில் முனீரைப் புகழ்ந்து பேசியுள்ளார்.. முனீரை ஒரு ‘அற்புதமான’ நபர் மற்றும் ‘சிறந்த போராளி’ என்று டிரம்ப் அழைத்தார்… பிப்ரவரி 28 முதல் மோதலில் ஈடுபட்டுள்ள அமெரிக்கா மற்றும் ஈரானுக்கு இடையே பேச்சுவார்த்தைகளை எளிதாக்கியதற்காகவும் அவருக்குப் பெருமை சேர்த்தார்.
இருப்பினும், முனீர் உண்மையில் அமெரிக்காவிற்கு ஒரு எச்சரிக்கை மணியாக இருக்கக்கூடும் என்று ஒரு அமெரிக்க ஊடகத்தின் அறிக்கை டிரம்ப் நிர்வாகத்தை எச்சரித்துள்ளது. ஃபாக்ஸ் நியூஸ் டிஜிட்டல் வெளியிட்ட அந்த அறிக்கை, ஈரான், குறிப்பாக இஸ்லாமியப் புரட்சிகரப் பாதுகாப்புப் படையுடன் (IRGC) முனீருக்கு இருக்கும் நெருக்கம், அமெரிக்கா மற்றும் டிரம்ப் நிர்வாகத்திற்கு நல்லதல்ல என்று தெரிவித்துள்ளது.
கொல்லப்பட்ட குட்ஸ் படைத் தளபதி காசிம் சுலைமானி உட்பட ஈரானின் உயர்மட்ட அதிகாரிகளுடன் முனீருக்குத் தொடர்பு இருந்ததாகவும், இது ஈரானுடனான பேச்சுவார்த்தைகளை எளிதாக்கவும், அமெரிக்காவுக்கும் ஈரானுக்கும் இடையில் ஒரு மறைமுக மத்தியஸ்தராகச் செயல்படவும் அவருக்கு உதவியதாகவும் அது கூறியது. டிரம்ப், முனீரைத் தனது ‘விருப்பமான ஃபீல்ட் மார்ஷல்’ என்றும் அழைத்தார், ஆனால் அவரது இரட்டைப் பதவி அமெரிக்க நலன்களுக்குப் பாதிப்பை ஏற்படுத்தக்கூடும் என்று அந்த அறிக்கை கூறியது.
“டிரம்ப் பாகிஸ்தானியர்களை நம்பக்கூடாது. பாகிஸ்தான் ஆப்கானிஸ்தானில் ஒரு துரோக கூட்டாளியாக’ இருந்தது; நமது நண்பர்களாக நடிப்பதோடு, தலிபான்களுக்கு ஆதரவளித்தது. முனீரின் ஐ.ஆர்.ஜி.சி உடனான தொடர்புகள், டிரம்ப் நிர்வாகத்திற்கு ஒரு மிகப்பெரிய அபாய எச்சரிக்கையாக இருக்க வேண்டும்,” என்று ஜனநாயகப் பாதுகாப்புக்கான அறக்கட்டளையின் (FDD) பில் ரோஜியோ ஃபாக்ஸ் நியூஸ் டிஜிட்டலிடம் கூறினார்.
ஈரானிய நலன்களை பாகிஸ்தான் பாதுகாக்கிறதா?
பாகிஸ்தானின் ‘துரோகக் கூட்டாளி’ என்ற வரலாறு, குறிப்பாக அது ஈரானுடன் நெருக்கமாகச் செயல்படுவதால், அதை ஒரு பாதுகாப்பு அபாயமாக மாற்றக்கூடும் என்று அந்த ஆய்வாளர்களும் நிபுணர்களும் அந்த அறிக்கையில் எச்சரித்துள்ளனர்.. முனீர், ஈரானிய நலன்களைப் பாதுகாக்க அல்லது பாகிஸ்தானை ஒரு தவிர்க்க முடியாத, ஆனால் நம்பகமற்ற இடைத்தரகராக நிலைநிறுத்துவதற்காக மட்டுமே டிரம்புடனான தனது உறவைப் பயன்படுத்தக்கூடும் என்றும் அது கூறியது.
“டிரம்ப் நீண்ட காலமாகவே வலிமையான, தீர்க்கமான தலைவர்களை விரும்புவதைக் காட்டியுள்ளார்.. முடிவுகளை வழங்கக்கூடிய ஒரு மையப்படுத்தப்பட்ட அதிகார நபராக முனீர் அந்த வரையறைக்குள் பொருந்துகிறார்.” என்று பாகிஸ்தானிய ஆய்வாளர் ராசா ரூமி ஃபாக்ஸ் நியூஸ் டிஜிட்டலிடம் கூறினார்.
மேலும் “வெளிப்படையாக அதிக வசீகரமான இராணுவத் தலைவர்களைப் போலல்லாமல், அவரது பாணி ஒப்பீட்டளவில் அடக்கமானது; அது வெளிப்படையான அரசியல் சமிக்ஞைகளை விட, உளவுப் பணி மற்றும் செயல்பாட்டு அனுபவத்தால் வடிவமைக்கப்பட்டுள்ளது.. முனீர் ஒழுங்கு, படிநிலை மற்றும் மூலோபாயத் தெளிவுக்கு வலுவான முக்கியத்துவம் கொடுக்கும், ஒழுக்கமான, நிறுவனங்களுக்கு முதலிடம் கொடுக்கும் தலைவர்” என்றும் ரூமி குறிப்பிட்டார்.
பாகிஸ்தானின் மிகவும் சக்திவாய்ந்த இராணுவத் தளபதி முனீர்தானா?
1968-ல் ஒரு நடுத்தரக் குடும்பத்தில் பிறந்த முனீர், 1986-ல் பாகிஸ்தான் இராணுவத்தில் சேர்ந்தார். அமெரிக்கா – ஈரான் பேச்சுவார்த்தைகளுக்கு உதவுவதற்காக தற்போது ஈரானில் இருக்கும் முனீர், கர்னலாக இருந்தபோது சவுதி அரேபியாவிலும் பணியாற்றியுள்ளார், மேலும் அரபு மொழியையும் கற்றுள்ளார். இராணுவப் புலனாய்வு மற்றும் முப்படைகளின் புலனாய்வு (ISI) ஆகிய இரண்டிற்கும் தலைமை தாங்கிய ஒரே இராணுவத் தளபதி இவர்தான்.
ஆபரேஷன் சிந்துரின் போது பாகிஸ்தானுக்கு எதிரான இந்தியாவின் வெற்றி இருந்தபோதிலும், தன்னை ஃபீல்ட் மார்ஷலாக முன்னிறுத்திக் கொண்ட முனீர், பர்வேஸ் முஷாரஃபிற்குப் பிறகு நாட்டின் மிகவும் சக்திவாய்ந்த இராணுவத் தளபதி என்று ஆய்வாளர்கள் கூறுகின்றனர். பிரதமர் ஷெபாஸ் ஷெரீஃப் “அமெரிக்க-ஈரான் அமைதிப் பேச்சுவார்த்தைகளில் முக்கிய நபராகத் தோன்றலாம், ஆனால் தவறாக எண்ண வேண்டாம், முடிவுகளை எடுப்பவர் ஆசிம் முனீர்தான்” என்று அவர்கள் வாதிடுகின்றனர்.
“பீல்ட் மார்ஷல் முனீர், பெர்வெஸ் முஷர்ரஃபிற்குப் பிறகு மிகவும் சக்திவாய்ந்த பாகிஸ்தான் தலைவர் ஆவார். இது அவருக்கு இராணுவ நியமனங்கள், குடிமை அரசாங்கத்தின் முடிவெடுக்கும் செயல்முறைகள் மற்றும் இராணுவத்தின் பரந்து விரிந்த வணிக சாம்ராஜ்யம் ஆகியவற்றின் மீது முழுமையான அதிகாரத்தை அளிக்கிறது,” என்று லோவி இன்ஸ்டிடியூட்டின் ஆராய்ச்சி அறிஞரான சார்லஸ் லயன்ஸ்-ஜோன்ஸ், தெரிவித்தார்..
