ஆப்பிரிக்க நாடான காங்கோவில் மீண்டும் எபோலா வைரஸ் பரவல் தீவிரமடைந்துள்ளதாக தகவல்கள் வெளியாகியுள்ளன. குறிப்பாக கிழக்கு இதுரி மாகாணம் பகுதியில் ஏற்பட்டுள்ள இந்த புதிய நோய்ப் பரவல், ஆப்பிரிக்க சுகாதார அமைப்புகளை மட்டுமல்லாமல் உலக நாடுகளையும் எச்சரிக்கையுடன் செயல்பட வைத்துள்ளது.
சுகாதார அதிகாரிகள் வெளியிட்ட தகவலின்படி, இதுவரை 65 பேர் உயிரிழந்துள்ளதாகவும், 246-க்கும் மேற்பட்ட சந்தேகத்திற்கிடமான நோய்த்தொற்றுகள் பதிவாகியுள்ளதாகவும் கூறப்பட்டுள்ளது. குறிப்பாக மோங்வாலு மற்றும் ருவாம்பாரா உள்ளிட்ட சுரங்கத் தொழில் நடைபெறும் பகுதிகளில் அதிகளவில் பாதிப்புகள் கண்டறியப்பட்டுள்ளன.
ஆப்பிரிக்க நோய் கட்டுப்பாடு மற்றும் தடுப்பு மையங்கள் இந்த நோய்ப் பரவலை அதிகாரப்பூர்வமாக உறுதி செய்துள்ளது. பல ஆண்டுகளில் ஏற்பட்ட மிக ஆபத்தான எபோலா அவசரநிலைகளில் இதுவும் ஒன்று என சுகாதார நிபுணர்கள் எச்சரித்துள்ளனர்.
விஞ்ஞானிகளை கவலைப்படுத்திய புதிய வைரஸ் வகை: இந்த முறை கண்டறியப்பட்டிருக்கும் வைரஸ், வழக்கமாக பரவும் “ஜைர்” வகை அல்லாமல், அரிதாகக் காணப்படும் “புண்டிபுக்யோ” திரிபாக இருக்கலாம் என்ற ஆரம்பகட்ட தகவல்கள் வெளியாகியுள்ளன. இதுவே விஞ்ஞானிகளை அதிக கவலையில் ஆழ்த்தியுள்ளது. ஏற்கனவே பயன்படுத்தப்பட்டு வரும் எர்வெபோ தடுப்பூசி பெரும்பாலும் ஜைர் வகை வைரஸுக்காகவே உருவாக்கப்பட்டதால், தற்போதைய பரவலுக்கு அது முழுமையாக பலன் அளிக்குமா என்பது குறித்து ஆய்வுகள் நடைபெற்று வருகின்றன.
இதையடுத்து உகாண்டா மற்றும் தெற்கு சூடான் உள்ளிட்ட அண்டை நாடுகள் எல்லை கண்காணிப்புகளை தீவிரப்படுத்தியுள்ளன. எல்லைச் சோதனைகள், தனிமைப்படுத்தல் நடவடிக்கைகள் மற்றும் அவசர சிகிச்சை மையங்கள் அமைக்கும் பணிகளும் வேகமடைந்துள்ளன. மேலும் வேர்ல்ட் ஹெல்த் ஆர்கனைசேஷன் மருத்துவக் குழுக்கள் மற்றும் நிதி உதவிகளை சம்பவ இடங்களுக்கு அனுப்பியுள்ளது.
எபோலா என்றால் என்ன? எபோலா என்பது மிகவும் ஆபத்தான வைரஸ் நோயாகும். இது “எபோலா வைரஸ் நோய்” (EVD) என அழைக்கப்படுகிறது. மனித உடலின் இரத்த நாளங்கள், உடல் உறுப்புகள் மற்றும் நோய் எதிர்ப்பு மண்டலத்தை இந்த வைரஸ் கடுமையாக தாக்குகிறது.
கடுமையான நிலைகளில் உடலின் உள்ளுறுப்பு செயலிழப்பு, உள் இரத்தப்போக்கு, அதிர்ச்சி மற்றும் உயிரிழப்பு ஏற்படக்கூடும். சில நோய்ப் பரவல்களில் இறப்பு விகிதம் 90 சதவீதம் வரை பதிவாகியுள்ளது. இந்த வைரஸ் முதன்முதலில் 1976-ஆம் ஆண்டு காங்கோவில் உள்ள எபோலா நதிக்கரையோரத்தில் கண்டறியப்பட்டது. அதன் பின்னர் அந்த நாட்டில் மட்டும் 17 முறை நோய்ப் பரவல் ஏற்பட்டுள்ளது.
எப்படி பரவுகிறது? விஞ்ஞானிகளின் கூற்றுப்படி, பழ வௌவால்கள் இந்த வைரஸின் இயற்கை தாங்கிகளாக இருக்கலாம். பாதிக்கப்பட்ட காட்டு விலங்குகள், குறிப்பாக குரங்குகள் மற்றும் மான்கள் மூலம் மனிதர்களுக்கு வைரஸ் பரவுகிறது. மனிதர்களுக்குள் பரவும்போது, இரத்தம், வாந்தி, உமிழ்நீர், வியர்வை, சிறுநீர் மற்றும் பிற உடல் திரவங்களின் மூலம் தொற்று ஏற்படுகிறது.
மருத்துவமனைகள் மற்றும் இறுதிச் சடங்குகள் போன்ற இடங்களில் நெருங்கிய தொடர்பு காரணமாக வைரஸ் வேகமாகப் பரவ வாய்ப்புள்ளது. ஆனால் கோவிட்-19 போல காற்றின் மூலம் இது பரவாது என்பதால், சாதாரணமாக அருகில் இருப்பதால் மட்டும் தொற்று ஏற்படாது என நிபுணர்கள் தெரிவித்துள்ளனர்.
எபோலா அறிகுறிகள் என்ன? எபோலா தொற்றின் அறிகுறிகள் பொதுவாக இரண்டு முதல் 21 நாட்களுக்குள் வெளிப்படும். ஆரம்பத்தில் திடீர் காய்ச்சல், கடுமையான சோர்வு, தலைவலி, தசை வலி மற்றும் தொண்டை வலி போன்றவை தோன்றும். பின்னர் வாந்தி, வயிற்றுப்போக்கு, வயிற்று வலி, தோல் தடிப்புகள் மற்றும் கடுமையான நிலைகளில் உள் மற்றும் வெளிப்புற இரத்தக்கசிவு ஏற்படக்கூடும். சிகிச்சை இல்லாமல் விட்டால் உடல் உறுப்புகள் செயலிழந்து உயிரிழப்பு ஏற்படும் அபாயம் அதிகம்.
எல்லை தாண்டிய அச்சம்: தற்போதைய நோய்ப் பரவல் நடைபெறும் இடுரி பகுதி ஆயுதக் குழுக்கள் மற்றும் சுரங்கத் தொழிலால் பாதிக்கப்பட்டுள்ளதால், மருத்துவக் குழுக்கள் பாதுகாப்பாகச் சென்று சிகிச்சை அளிப்பதில் சிரமம் நிலவுகிறது. ஏற்கனவே நோய்த்தொற்றுடன் எல்லை கடந்த காங்கோ பயணி ஒருவரால் உகண்டாவில் ஒரு உயிரிழப்பு பதிவாகியுள்ளது. இதனால் எல்லை தாண்டி பரவிவிடுமோ என்ற அச்சம் அதிகரித்துள்ளது.
உலகம் மீண்டும் எச்சரிக்கையில்: 2014 முதல் 2016 வரை கினியா, லைபீரியா மற்றும் சியரா லியோன் நாடுகளில் ஏற்பட்ட எபோலா பரவலில் 11,000-க்கும் மேற்பட்டோர் உயிரிழந்தனர். இதுவே உலகின் மிக மோசமான எபோலா பரவலாக கருதப்படுகிறது. இப்போது மருத்துவக் குழுக்கள் விரைவான தனிமைப்படுத்தல், தொடர்பு கண்காணிப்பு, பாதுகாப்பு உபகரணங்கள் மற்றும் சோதனை சிகிச்சைகள் மூலம் நோயைக் கட்டுப்படுத்த முயற்சி செய்து வருகின்றன.
உலகளாவிய பொதுமக்களுக்கு தற்போது பெரிய ஆபத்து இல்லை என நிபுணர்கள் தெரிவித்தாலும், பாதிக்கப்பட்ட பகுதிகளில் மிகுந்த எச்சரிக்கை அவசியம் என சுகாதார அமைப்புகள் அறிவுறுத்தியுள்ளன.
