நம்மில் பலர் வீட்டில் இடப்பற்றாக்குறை காரணமாக குளிர்சாதனப் பெட்டியை (ஃபிரிட்ஜ்) சுவரோடு ஒட்டியபடி வைத்திருப்போம். ஆனால், இது நல்ல பழக்கம் அல்ல என்று நிபுணர்கள் எச்சரிக்கின்றனர். ஃபிரிட்ஜ் சரியாக இயங்கவும், நீண்ட நாட்கள் பழுதில்லாமல் இருக்கவும் அதைச் சுற்றி போதிய இடைவெளி இருப்பது மிகவும் அவசியம். பொதுவாக, ஃபிரிட்ஜின் பின்புறத்தில் குறைந்தது 1 முதல் 2 அங்குலம் (2.5 முதல் 5 செ.மீ.) வரை இடைவெளி இருக்க வேண்டும். அதேபோல், மேல் பகுதி மற்றும் இருபுறங்களிலும் குறைந்தது 1 முதல் 1.5 அங்குலம் இடைவெளி விடுவது நல்லது.
சில பெரிய மாடல் ஃபிரிட்ஜ்களுக்கு பின்புறத்தில் 4 அங்குலம் வரை இடைவெளி வைக்கவும் உற்பத்தியாளர்கள் பரிந்துரைக்கின்றனர். இந்த இடைவெளி இருப்பதால் ஃபிரிட்ஜில் உருவாகும் வெப்பம் எளிதாக வெளியேறுகிறது. இதனால் கம்ப்ரசர் அதிக சுமை இல்லாமல் இயங்கி, மின்சாரமும் குறைவாக செலவாகும். ஆனால் சுவரோடு ஒட்டியபடி வைத்தால் வெப்பம் வெளியேறாமல் தேங்கிவிடும். இதன் காரணமாக கம்ப்ரசர் அதிக நேரம் வேலை செய்ய வேண்டிய நிலை ஏற்படும். இதனால் மின்கட்டணம் அதிகரிப்பதுடன், ஃபிரிட்ஜின் குளிர்விக்கும் திறனும் குறையலாம்.
நீண்ட காலம் இப்படியே பயன்படுத்தினால், கம்ப்ரசர் விரைவில் பழுதாகும் அபாயம் உள்ளது. அதோடு, பராமரிப்பு செலவும் அதிகரிக்கலாம். மேலும், ஃபிரிட்ஜின் பின்புறத்தில் தூசி அதிகமாக படிய விடக்கூடாது. சில மாதங்களுக்கு ஒருமுறை பின்புற காயில்கள் மற்றும் காற்றோட்டப் பகுதிகளை சுத்தம் செய்தால், ஃபிரிட்ஜ் சிறப்பாக செயல்படும். அதேபோல், ஃபிரிட்ஜை நேரடி வெயில் படும் இடத்தில் வைக்கக் கூடாது. அடுப்பு, ஓவன் போன்ற அதிக வெப்பம் வெளியிடும் சாதனங்களுக்கு அருகிலும் வைக்காமல் இருப்பது நல்லது.
ஃபிரிட்ஜை எப்போதும் சமமான தரையில் வைக்க வேண்டும். இல்லையெனில் அதன் செயல்பாட்டில் பாதிப்பு ஏற்படலாம். ஃபிரிட்ஜின் கதவை அடிக்கடி திறந்து மூடுவதையும், நீண்ட நேரம் திறந்தே வைத்திருப்பதையும் தவிர்க்க வேண்டும். மேலும், உள்ளே பொருட்களை அளவுக்கு அதிகமாக அடுக்கி வைக்காமல் இருந்தால், குளிர்ந்த காற்று சீராக பரவி உணவுப் பொருட்களும் நன்றாக பாதுகாக்கப்படும். ஒவ்வொரு ஃபிரிட்ஜுக்கும் இடைவெளி மற்றும் பராமரிப்பு விதிமுறைகள் சிறிது மாறுபடலாம். எனவே, உங்கள் ஃபிரிட்ஜுடன் வழங்கப்பட்டுள்ள User Manual-ஐ ஒருமுறை பார்த்து, அதில் கூறப்பட்டுள்ள வழிமுறைகளைப் பின்பற்றுவது மிகவும் நல்லது.
