உணவுப் பொருட்கள் தொடர்பான விளம்பரங்கள், தயாரிப்பு லேபிள்கள் மற்றும் நிறுவனங்களின் விதிமுறை இணக்கத்தை தீவிரமாக கண்காணித்து வரும் இந்திய உணவு பாதுகாப்பு மற்றும் தர நிர்ணய ஆணையம் (FSSAI), பல்வேறு உணவு மற்றும் குளிர் பான நிறுவனங்களுக்கு எதிராக அதிரடி நடவடிக்கை எடுத்துள்ளது.
சமீபத்திய மாதங்களில் மேற்கொள்ளப்பட்ட ஆய்வுகள் மற்றும் அமலாக்க நடவடிக்கைகளின் அடிப்படையில், 150-க்கும் மேற்பட்ட நோட்டீஸ்கள் உணவு நிறுவனங்களுக்கு வழங்கப்பட்டுள்ளதாக FSSAI தெரிவித்துள்ளது. தவறாக வழிநடத்தும் விளம்பரங்கள், உண்மைக்கு மாறானதாகக் கூறப்படும் தயாரிப்பு விளக்கங்கள் மற்றும் உணவுப் பொருட்களின் லேபிளிங் விதிகளை முறையாகப் பின்பற்றாதது உள்ளிட்ட காரணங்கள் இதில் இடம்பெற்றுள்ளன.
முன்னணி நிறுவனங்கள் மீது நடவடிக்கை:
FSSAI வெளியிட்ட தகவலின்படி, பல முன்னணி உணவு மற்றும் பான நிறுவனங்களும் இந்த நடவடிக்கையின் கீழ் வந்துள்ளன. அதன்படி Nestle India, PepsiCo, Abbott India, Red Bull India, Danone India, Monster Energy India, Mondelez India, Coca-Cola India, Diageo, Pernod Ricard, Ferrero India மற்றும் Kenvue உள்ளிட்ட 150 நிறுவனங்களின் பெயர்கள் குறிப்பிடப்பட்டுள்ளன.
மேலும் ஆற்றல் பானங்கள் மற்றும் மதுபானங்கள் உள்ளிட்ட பிரிவுகளிலும் உணவு பாதுகாப்பு விதிமுறைகள் தொடர்பாக கண்காணிப்பு மேற்கொள்ளப்பட்டதாக தெரிவிக்கப்பட்டுள்ளது.
Amazon, Flipkart நிறுவனங்களுக்கும் நோட்டீஸ்:
உணவு பொருட்களை விற்பனை செய்யும் இ-காமர்ஸ் தளங்களும் FSSAI நடவடிக்கையில் இருந்து தப்பவில்லை. Amazon மற்றும் Flipkart உள்ளிட்ட நிறுவனங்களுக்கு மொத்தம் 12 நோட்டீஸ்கள் வழங்கப்பட்டுள்ளதாக தெரிவிக்கப்பட்டுள்ளது.
மேலும், Amazon நிறுவனத்தின் ஒரு கிடங்கின் உரிமமும் ரத்து செய்யப்பட்டதாக FSSAI தெரிவித்துள்ளது.
உணவகங்களுக்கும் நடவடிக்கை:
உணவு சேவை நிறுவனங்களுக்கும் FSSAI நடவடிக்கை எடுத்துள்ளது. KFC, McDonald’s, Pizza Hut, Domino’s மற்றும் Costa Coffee உள்ளிட்ட உணவக நிறுவனங்களுக்கு எதிராக 30-க்கும் மேற்பட்ட நோட்டீஸ்கள் வழங்கப்பட்டுள்ளதாக கூறப்பட்டுள்ளது.
மேலும், Domino’s நிறுவனத்துடன் தொடர்புடைய 5 உரிமங்கள் இடைநிறுத்தப்பட்டுள்ளதாகவும் FSSAI தெரிவித்துள்ளது.
விதிமுறைகளை கடைப்பிடிக்க வலியுறுத்தல்:
உணவு பொருட்களின் பாதுகாப்பு மட்டுமின்றி, அவற்றின் விளம்பரங்களில் இடம்பெறும் தகவல்கள் மற்றும் பேக்கேஜிங் லேபிள்களில் வழங்கப்படும் விவரங்களும் விதிமுறைகளுக்கு உட்பட்டதாக இருக்க வேண்டும் என FSSAI வலியுறுத்தி வருகிறது.
நோட்டீஸ் பெற்ற சில நிறுவனங்கள் ஏற்கனவே தேவையான திருத்த நடவடிக்கைகளை மேற்கொள்ளத் தொடங்கியுள்ளதாகவும் உணவு பாதுகாப்பு அமைப்பு தெரிவித்துள்ளது.
இந்த தொடர் நடவடிக்கைகள் மூலம், உணவு நிறுவனங்கள் தவறான விளம்பரங்கள் மற்றும் விதிமுறை மீறல்களை தவிர்த்து, நுகர்வோருக்கு சரியான தகவல்களை வழங்க வேண்டும் என்ற கட்டுப்பாட்டை FSSAI மேலும் தீவிரப்படுத்தியுள்ளது.
