கணவரின் தம்பி மீது ஏற்பட்ட மோகம்.. கள்ளக்காதலை தட்டிக்கேட்ட கணவனுக்கு நேர்ந்த கொடூரம்!

கடலூர் மாவட்டத்தில் கிணற்றில் இளைஞர் ஒருவர் சடலமாக மீட்கப்பட்ட சம்பவம், போலீசாரின் தொடர் விசாரணையில் எதிர்பாராத கொலை வழக்காக மாறியுள்ளது. 10 ஆண்டுகளாக திருமண வாழ்க்கையில் இருந்த ஒருவரின் மரணம், குடும்பத்துக்குள் ஏற்பட்ட உறவு பிரச்சனையுடன் தொடர்புடையது என்பது விசாரணையில் வெளிச்சத்துக்கு வந்துள்ளது. மனைவியுடன் தொடர்பில் இருந்ததாக சந்தேகிக்கப்பட்ட நபருடன் ஏற்பட்ட மோதலே உயிரிழப்புக்கு காரணமானதாக போலீசார் தெரிவித்துள்ளனர்.

கடலூர் மாவட்டம் வேப்பூர் அருகே ஓரங்கூர் கிராமத்தைச் சேர்ந்தவர் இளையராஜா, 39. விடுதலை சிறுத்தைகள் கட்சியின் ஓரங்கூர் முகாம் செயலாளராகவும் அவர் செயல்பட்டு வந்தார். இவரது மனைவி அஸ்வினிதா, 30. இருவரும் சுமார் 10 ஆண்டுகளுக்கு முன்பு காதலித்து திருமணம் செய்து கொண்டனர். இவர்களுக்கு இரண்டு குழந்தைகள் உள்ளனர்.

இந்த நிலையில், கடந்த ஆகஸ்ட் 12ஆம் தேதி இளையராஜா வீட்டின் அருகே உள்ள கிணற்றில் சடலமாக மீட்கப்பட்டார். இதுகுறித்து சிறுபாக்கம் போலீசார் வழக்குப்பதிவு செய்து, அவரது மரணம் தொடர்பான காரணங்களை விசாரிக்கத் தொடங்கினர்.

விசாரணையின் ஒரு பகுதியாக இளையராஜாவின் செல்போன் தொடர்புகள் மற்றும் அவருடன் நெருக்கமாக இருந்தவர்களின் நடவடிக்கைகள் ஆய்வு செய்யப்பட்டன. அப்போது, அவரது மனைவி அஸ்வினிதாவுக்கும் இளையராஜாவின் சித்தி மகன் வெங்கடேசனுக்கும் இடையே நெருங்கிய தொடர்பு இருந்தது போலீசாரின் கவனத்திற்கு வந்தது.

இதையடுத்து வெங்கடேசனிடம் நடத்தப்பட்ட விசாரணையில் சம்பவத்தன்று இளையராஜாவும் அவரும் ஒன்றாக மதுபானம் அருந்தியது தெரியவந்தது. அந்த நேரத்தில் அஸ்வினிதாவுடன் வெங்கடேசன் வைத்திருந்த தொடர்பு குறித்து இளையராஜா கேள்வி எழுப்பியுள்ளார். இதனால் இருவருக்கும் இடையே தகராறு ஏற்பட்டுள்ளது.

இந்த மோதலில் வெங்கடேசன் இளையராஜாவை தாக்கியதாகவும், இதில் அவர் மயங்கி விழுந்ததாகவும் விசாரணையில் தெரியவந்துள்ளது. அதன் பின்னர், அவரை காரில் ஏற்றிக்கொண்டு வெங்கடேசனும் அவரது நண்பர் செல்வமும் இரவு முழுவதும் பல்வேறு பகுதிகளில் சென்றுள்ளனர்.

பின்னர் இளையராஜாவின் உடலை கிணற்றில் வீசியதாக போலீஸ் விசாரணையில் தெரியவந்துள்ளது. சம்பவத்தைத் தொடர்ந்து இளையராஜாவின் வாகனத்தை அவரது நண்பர் மூலம் எடுத்துச் சென்றது உள்ளிட்ட நடவடிக்கைகளும் போலீசாரின் விசாரணையில் தெரியவந்தன.

இதையடுத்து கிடைத்த தகவல்கள் மற்றும் செல்போன் பதிவுகளை அடிப்படையாகக் கொண்டு போலீசார் நடவடிக்கை எடுத்தனர். இளையராஜாவின் மரணத்துடன் தொடர்புடையதாக அவரது மனைவி அஸ்வினிதா, வெங்கடேசன் மற்றும் அவரது நண்பர் செல்வம் ஆகிய மூவரையும் கைது செய்து, சம்பவத்தின் முழுமையான பின்னணி குறித்து தொடர்ந்து விசாரணை நடத்தி வருகின்றனர்.

Also Read: கள்ளக்காதலனுடன் புதுமனைவி செய்த அந்த ஒரு காரியம்.. நேரில் பார்த்த கணவன் எடுத்த அதிரடி முடிவு!