வங்கிகளில் தொடர்ந்து 3 நாட்களுக்கு சேவைகள் பாதிக்கப்படும் சூழல் உருவாகியுள்ளது. வாரத்தில் 5 நாட்கள் மட்டுமே வங்கிகள் செயல்பட வேண்டும் என்பது உள்ளிட்ட கோரிக்கைகளை வலியுறுத்தி வங்கி ஊழியர் சங்கங்கள் செப்டம்பர் 28 முதல் 30-ம் தேதி வரை நாடு தழுவிய வேலைநிறுத்தத்தில் ஈடுபடுகின்றன.
இந்த வேலைநிறுத்தத்தின் தாக்கம் குறிப்பாக பொதுத்துறை வங்கிகள் மற்றும் பிராந்திய கிராமப்புற வங்கிகளின் கிளை சேவைகளில் அதிகமாக இருக்கலாம். காசோலை பரிவர்த்தனை, பணம் செலுத்துதல், பணம் எடுப்பது உள்ளிட்ட நேரடி வங்கி சேவைகள் பாதிக்கப்பட வாய்ப்புள்ளது. அதே நேரத்தில், ஏடிஎம், UPI, இணைய வங்கி, மொபைல் வங்கி போன்ற டிஜிட்டல் சேவைகள் வழக்கம்போல் கிடைக்க வாய்ப்புள்ளது.
ICICI Bank, HDFC Bank, Axis Bank உள்ளிட்ட புதிய தலைமுறை தனியார் வங்கிகளின் கிளைகள் இந்த வேலைநிறுத்தத்தில் வழக்கம்போல் செயல்படும் என தெரிவிக்கப்பட்டுள்ளது.
இந்த வேலைநிறுத்தத்துக்கு முன்னதாக செப்டம்பர் 11-ம் தேதியும் நாடு முழுவதும் ஒருநாள் வேலைநிறுத்தம் நடைபெற்றது. தற்போது செப்டம்பர் 28 முதல் 30 வரை 3 நாள் வேலைநிறுத்தத்துக்கு அழைப்பு விடுக்கப்பட்டுள்ளது. மேலும் கோரிக்கைகள் நிறைவேறாவிட்டால் அக்டோபர் 26 முதல் காலவரையற்ற வேலைநிறுத்தத்தில் ஈடுபடவும் வங்கி சங்கங்கள் திட்டமிட்டுள்ளன.
வாரத்தில் 5 நாட்கள் மட்டுமே வங்கிகள் செயல்பட வேண்டும் என்பது நீண்டகாலமாக வங்கி ஊழியர் சங்கங்களின் முக்கிய கோரிக்கையாக இருந்து வருகிறது. இதனுடன் ஓய்வூதியப் பலன்களை மேம்படுத்துதல், அனைத்து ஓய்வூதியதாரர்களுக்கும் ஒரே மாதிரியான அகவிலைப்படி கணக்கீட்டு முறையை கொண்டு வருதல் உள்ளிட்ட கோரிக்கைகளும் முன்வைக்கப்பட்டுள்ளன.
தேசிய ஓய்வூதியத் திட்டத்தின் கீழ் உள்ள ஊழியர்களுக்கு பழைய ஓய்வூதியத் திட்டத்திற்கு மாறும் வாய்ப்பை வழங்க வேண்டும் என்பதும் சங்கங்களின் கோரிக்கைகளில் ஒன்றாக உள்ளது.
இதற்கிடையே, வேலைநிறுத்தம் காரணமாக வாடிக்கையாளர்களுக்கு ஏற்படும் பாதிப்பை குறைக்கும் வகையில் வங்கிகள் முன்கூட்டியே அறிவுறுத்தல்களை வழங்கியுள்ளன. அத்தியாவசிய பரிவர்த்தனைகளை வேலைநிறுத்த நாட்களுக்கு முன்பே முடித்துக்கொள்ளுமாறு வாடிக்கையாளர்களிடம் அறிவுறுத்தப்பட்டுள்ளது.
தொடர்ந்து 5 நாட்கள் வங்கி சேவைகள் பாதிக்கப்படுவதைத் தவிர்க்கும் வகையில் செப்டம்பர் 27, ஞாயிற்றுக்கிழமையன்று பொதுத்துறை வங்கிகள் மற்றும் பிராந்திய கிராமப்புற வங்கிகளை செயல்பட வைக்க மத்திய அரசு நடவடிக்கை எடுத்துள்ளது. இதற்கு ரிசர்வ் வங்கியும் ஒப்புதல் வழங்கியுள்ளது.
வங்கி சங்கங்களின் முக்கிய கோரிக்கைகளில் ஒன்றான Performance Linked Incentive (PLI) திட்டத்தை அரசு ஏற்கனவே தற்காலிகமாக நிறுத்தியுள்ளது. ஆனால் 5 நாள் வங்கி வேலை வாரம் தொடர்பான கோரிக்கையில் இதுவரை இறுதி முடிவு எட்டப்படவில்லை. இதையடுத்து வேலைநிறுத்தத்தைத் தொடர வங்கி சங்கங்கள் முடிவு செய்துள்ளன.
மேலும், செப்டம்பர் 30-ம் தேதி வங்கிகளின் அரையாண்டு கணக்கு முடிப்பு நாளாக இருப்பதால், அந்த நாளில் வேலைநிறுத்தம் நடைபெறுவது வாடிக்கையாளர்கள் மற்றும் வணிக நிறுவனங்களின் பரிவர்த்தனைகளில் கூடுதல் தாக்கத்தை ஏற்படுத்தக்கூடும் என நிதி அமைச்சகம் குறிப்பிட்டுள்ளது.
Also Read: “இனி பொறுத்துக்கொள்ள முடியாது”.. பயங்கரவாதம் குறித்து பிரதமர் மோடி பேசியது என்ன?
