விவசாயிகளுக்கு வழங்கப்படும் வட்டியில்லா பயிர்க்கடன் கடந்த ஆண்டை விட ரூ.1300 கோடி அதிகமாக வழங்கப்பட்டுள்ளதாக கூட்டுறவுத்துறை அமைச்சர் ஐ.பெரியசாமி தெரிவித்துள்ளார்.
சென்னை தலைமைச் செயலகத்தில் செய்தியாளர்களிடம் பேசிய அமைச்சர் ஐ.பெரியசாமி, ”கடந்த ஆண்டு ரூ.407 கோடி பயிர்க் கடன் வழங்கப்பட்ட நிலையில், இந்தாண்டு ரூ.1764 கோடி வழங்கப்பட்டு உள்ளதாக தெரிவித்தார். விவசாயத்திற்கு வழங்கப்பட்டு வரும் வட்டியில்லா கடன் போன்று, கால்நடைகளை மேய்ப்பதற்கு நிலம் இல்லாதவர்களும் தங்களது கால்நடைகளை வளர்ப்பதற்கு தீவனம் வாங்குவதற்கு வட்டியில்லா கடன் வழங்கப்படும் என்று அறிவிப்பு வெளியிடப்பட்டது. இதன் மூலம் இந்தாண்டு ரூ.263 கோடி தற்போது வரை கடன் வழங்கப்பட்டுள்ளதாக தெரிவித்தார்.
மேலும், 5 சவரன் வரை நகை அடமானம் வைத்து கூட்டுறவு வங்கிகளில் கடன் பெற்ற விவசாயிகளுக்கு நகை கடன்கள் முழுமையாக தள்ளுபடி செய்யப்பட்டுள்ளதாகவும், கடந்த ஆட்சியில் நடைபெற்றது போன்ற முறைகேடுகள் நடைபெறாமல் தடுக்க கடன் வழங்குவதற்கு உரிய விதிமுறைகளை கடைபிடிக்கவும், ஒவ்வொரு ஆண்டு இறுதியிலும் நடைக்கடன் ஆடிட் செய்வதற்கும் உத்தரவிடப்பட்டுள்ளதாக அமைச்சர் ஐ.பெரியசாமி தெரிவித்தார்.
