தமிழகத்தில் சென்னை, கோவை, திருப்பூர், சேலம் உள்ளிட்ட பல்வேறு மாவட்டங்களில் டெங்கு காய்ச்சலின் தாக்கம் நாளுக்கு நாள் தீவிரமடைந்து வருகிறது. இதுவரை மாநிலம் முழுவதும் 16 ஆயிரத்து 500க்கும் மேற்பட்டோர் டெங்கு தொற்றால் பாதிக்கப்பட்டுள்ளதாகவும், 10க்கும் மேற்பட்டோர் சிகிச்சை பலனின்றி உயிரிழந்துள்ளதாகவும் சுகாதாரத்துறை தெரிவித்துள்ளது.
கொசுக்களால் பரவும் இந்த தொற்று சில நேரங்களில் உயிருக்கே உலைவைக்கும் ஆபத்தான கட்டத்தை எட்டக்கூடும் என்பதால், மக்கள் உரிய முன்னெச்சரிக்கையுடன் இருக்க வேண்டும் என மருத்துவர்கள் எச்சரித்துள்ளனர்.
டெங்கு பாதிப்பு திடீரென அதிகரிக்க காரணம் என்ன?
தொடர் மழையால் ஆங்காங்கே தேங்கி நிற்கும் நல்ல நீரில், டெங்குவை பரப்பும் ‘ஏடிஸ் எஜிப்டி’ (Aedes aegypti) கொசுக்கள் தீவிரமாக இனப்பெருக்கம் செய்கின்றன.
தீவிர நகரமயமாக்கல், திறந்த நிலையில் உள்ள நீர்த்தேக்கங்கள் மற்றும் தூர்வாரப்படாத மழைநீர் வடிகால்கள் கொசுக்களின் உற்பத்திக் கூடங்களாக மாறுகின்றன.
மாடித் தொட்டிகள், மூடப்படாத டிரம்கள், பூந்தொட்டித் தட்டுகள் மற்றும் பயன்பாடற்ற பிளாஸ்டிக் கழிவுகளில் தேங்கும் நீரே கொசுக்கள் வளர முக்கியக் காரணியாகிறது.
யாருக்கு ஆபத்து அதிகம்?
டெங்கு தொற்று யாரை வேண்டுமானாலும் தாக்கக்கூடும் என்றாலும், கைக்குழந்தைகள், சிறுவர்கள், கர்ப்பிணிகள், முதியவர்கள், நோய் எதிர்ப்புச் சக்தி குறைவாக உள்ளவர்கள், நீரிழிவு மற்றும் உயர் ரத்த அழுத்தம் உள்ளிட்ட நாள்பட்ட நோயாளிகள் கூடுதல் கவனத்துடன் இருக்க வேண்டும்.
ஒருவருக்கு மீண்டும் டெங்கு வருமா?
டெங்கு வைரஸில் நான்கு வகைகள் (DENV-1, DENV-2, DENV-3, DENV-4) உள்ளன. ஒருவருக்கு ஒரு குறிப்பிட்ட வகை வைரஸ் தாக்கி குணமானால், அந்த ஒரு வகைக்கு மட்டுமே வாழ்நாள் நோய் எதிர்ப்புச் சக்தி கிடைக்கும். மற்ற மூன்று வகை வைரஸ்கள் மூலம் மீண்டும் டெங்கு தாக்க அதிக வாய்ப்புள்ளது. அவ்வாறு இரண்டாவது முறை வேறு வகை வைரஸால் பாதிக்கப்படும்போது, அது ‘Dengue Hemorrhagic Fever’ அல்லது ‘Dengue Shock Syndrome’ போன்ற தீவிர ரத்தக்கசிவு மற்றும் அதிர்ச்சி நிலைக்குக் கொண்டுசெல்லும் ஆபத்து அதிகம்.
எச்சரிக்கை அறிகுறிகள்:
* தொடர்ந்து நீடிக்கும் கடுமையான வயிற்றுவலி
* எதையும் உட்கொள்ள முடியாத அளவு தொடர் வாந்தி
* ஈறுகள், மூக்கு அல்லது மலம் கழிக்கும்போது ரத்தக்கசிவு ஏற்படுதல்
* உடல் குளிர்ந்து போதல், அதீத சோர்வு மற்றும் மனக்குழப்பம்
* சிறுநீர் வெளியேறும் அளவு குறைதல் மற்றும் மூச்சுத் திணறல்
* தற்காப்பு மற்றும் முன்னெச்சரிக்கை நடவடிக்கைகள்:
* பூந்தொட்டித் தட்டுகள், பிரிட்ஜ் பின்புற தட்டுகள் மற்றும் பக்கெட்டுகளில் உள்ள தண்ணீரை வாரம் ஒருமுறை அகற்றிச் சுத்தப்படுத்த வேண்டும்.
* குடிநீர் சேமித்து வைக்கும் தொட்டிகள் மற்றும் டிரம்களை எப்போதும் காற்றுப் புகாமல் மூடி வைக்க வேண்டும்.
* கொசுக் கடியைத் தவிர்க்க உடலை முழுமையாக மூடும் ஆடைகளை அணிவதுடன், காலை மற்றும் மாலை நேரங்களில் ஜன்னல்களை மூடி வைக்க வேண்டும்.
முக்கிய எச்சரிக்கை :
காய்ச்சல் அல்லது உடல் வலி ஏற்பட்டால் சொந்தமாக மருந்துக்கடைகளில் Ibuprofen, Aspirin, Diclofenac போன்ற வலி நிவாரணி மாத்திரைகளை வாங்கி உட்கொள்ளவே கூடாது. இவை ரத்தக்கசிவு அபாயத்தைப் பன்மடங்கு அதிகரித்துவிடும். மருத்துவரின் ஆலோசனையுடன் பாராசிட்டமால் (Paracetamol) மட்டுமே உட்கொள்ள வேண்டும்.
சுற்றுப்புறத்தை உலர்வாகவும் தூய்மையாகவும் பராமரித்து, எச்சரிக்கை அறிகுறிகள் தென்பட்ட உடனேயே மருத்துவ உதவியை நாடுவதன் மூலம் டெங்குவின் கொடூர விளைவுகளில் இருந்து உயிரைப் பாதுகாக்க முடியும்.
