வீட்டை தினமும் சுத்தம் செய்தாலும் சில மணி நேரங்களிலேயே மீண்டும் தூசி படிந்துவிடுகிறதா? தரையை துடைப்பது மட்டும் போதாது. வீட்டுக்குள் தூசி சேருவதற்கு நாம் தினசரி பயன்படுத்தும் சில பொருட்கள், காற்றோட்டம் மற்றும் சுத்தம் செய்யும் முறைகளும் காரணமாக இருக்கலாம்.
கதவு, ஜன்னல் மற்றும் காற்றோட்டம் அதிகமாக இருக்கும் பகுதிகள் வழியாக வெளிப்புறத்தில் இருந்து தூசி வீட்டுக்குள் வருவது இயல்பானது. குறிப்பாக சாலையை ஒட்டிய வீடுகளில் வாகனங்கள் செல்லும்போது எழும் தூசித் துகள்கள் காற்றுடன் வீட்டுக்குள் நுழையலாம். ஜன்னல்களை திறந்து வைக்கும் நேரம் மற்றும் காற்றின் திசையும் இதில் தாக்கத்தை ஏற்படுத்தும்.
வீட்டில் இருக்கும் துணிகள், திரைச்சீலைகள், கார்பெட்கள் மற்றும் படுக்கை விரிப்புகளிலும் நுண்ணிய தூசித் துகள்கள் எளிதில் தேங்கும். இவற்றை நீண்ட நாட்களுக்கு சுத்தம் செய்யாமல் விட்டால், அறையை சுத்தம் செய்யும் நேரத்திலும் தூசி மீண்டும் காற்றில் கலந்து மற்ற இடங்களில் படியலாம்.
சோபா, மெத்தை, தலையணை போன்றவற்றையும் கவனிக்க வேண்டும். இவற்றை வெறுமனே மேல்புறத்தில் துடைப்பதால் உள்ளே தேங்கியிருக்கும் தூசி முழுமையாக அகலாது. குறிப்பிட்ட இடைவெளியில் வாக்யூம் கிளீனர் பயன்படுத்தி சுத்தம் செய்வது உதவியாக இருக்கும்.
மற்றொரு முக்கியமான காரணம் வீட்டுக்குள் பயன்படுத்தப்படும் அலங்காரப் பொருட்கள். அதிகமான அலங்காரப் பொருட்கள், திறந்த அலமாரிகள், புத்தகங்கள் மற்றும் சிறிய பொருட்கள் இருக்கும் இடங்களில் தூசி படிவதற்கான வாய்ப்பு அதிகம். பொருட்களின் எண்ணிக்கையை குறைத்து, பயன்படுத்தாதவற்றை மூடிய இடங்களில் வைப்பது சுத்தம் செய்வதையும் எளிதாக்கும்.
விசிறி இறக்கைகளிலும் தூசி அதிகமாக சேரும். விசிறியை இயக்கும்போது அதில் படிந்திருக்கும் தூசி அறை முழுவதும் பரவக்கூடும். எனவே விசிறி, விளக்கு, அலமாரியின் மேற்பகுதி போன்ற உயரமான இடங்களையும் குறிப்பிட்ட இடைவெளியில் சுத்தம் செய்ய வேண்டும்.
தரையை சுத்தம் செய்யும்போது முதலில் உலர்ந்த துடைப்பத்தை பயன்படுத்தி தூசியை காற்றில் பறக்கவிடுவதற்குப் பதிலாக, வாக்யூம் கிளீனர் அல்லது சற்று ஈரமான மைக்ரோஃபைபர் துணியை பயன்படுத்தலாம். இதனால் தூசி மீண்டும் காற்றில் கலப்பது குறையும்.
வீட்டுக்குள் செருப்பு அணிந்து நடப்பதும் வெளிப்புற அழுக்கு மற்றும் தூசியை உள்ளே கொண்டு வரக்கூடும். அதனால் வீட்டின் நுழைவாயிலில் செருப்புகளை வைக்கும் இடத்தை தனியாக அமைத்து, உள்ளே பயன்படுத்தும் காலணிகள் மற்றும் வெளியே பயன்படுத்தும் காலணிகளைப் பிரித்து வைத்துக்கொள்வது உதவும்.
தூசி சேர்வதை முழுமையாகத் தடுக்க முடியாவிட்டாலும், அதன் அளவை கணிசமாகக் குறைக்க முடியும். ஜன்னல் மற்றும் கதவுப் பகுதிகளை சுத்தமாக வைத்திருப்பது, திரைச்சீலை மற்றும் படுக்கை விரிப்புகளை முறையாக துவைப்பது, விசிறி மற்றும் உயரமான பகுதிகளை சுத்தம் செய்வது, தேவையற்ற பொருட்களை குவிக்காமல் இருப்பது போன்ற பழக்கங்கள் வீட்டை நீண்ட நேரம் சுத்தமாக வைத்திருக்க உதவும்.
Also Read: நோயாளியின் உடலை எடுத்துச் சென்ற ஆம்புலன்ஸ்.. வழியில் நடந்த கோர விபத்து; செவிலியர் பலி!
