குழந்தைகள் மீதான பாலியல் குற்றங்கள் நாளுக்கு நாள் சமூகத்தில் பெரும் அச்சத்தையும் அதிர்ச்சியையும் ஏற்படுத்தி வருகின்றன. குறிப்பாக பச்சிளம் குழந்தைகள்கூட இதுபோன்ற கொடுமைகளுக்கு ஆளாவது, அவர்களின் பாதுகாப்பு குறித்து பல்வேறு கேள்விகளை எழுப்புகிறது. கரூர் மாவட்டம் குளித்தலையில் 4 வயது சிறுமிக்கு நேர்ந்த பாலியல் வன்கொடுமையும், அதைத் தொடர்ந்து அவரது பாட்டி எடுத்த நடவடிக்கையும் தற்போது பரபரப்பை ஏற்படுத்தியுள்ளது.
குளித்தலை அருகே உள்ள குண்டாங்கல்பாறை புத்தர் நகர் பகுதியில் இந்த சம்பவம் நடந்துள்ளது. அப்பகுதியைச் சேர்ந்த கூலித்தொழிலாளி ஒருவர் தனது 4 வயது மகளை பாட்டி வீட்டில் விட்டுச் செல்லுமாறு அதே பகுதியைச் சேர்ந்த மாணிக்கம் (31) என்பவரிடம் தெரிவித்துள்ளார். சிறுமியை பாட்டி வீட்டிற்கு அழைத்துச் செல்வதற்கு பதிலாக மாணிக்கம் தனது வீட்டிற்கு அழைத்துச் சென்றுள்ளார். அங்கு யாரும் இல்லாத நேரத்தில் சிறுமியை பாலியல் வன்கொடுமை செய்துவிட்டு, பின்னர் பாட்டி வீட்டின் அருகே சிறுமியை விட்டுச் சென்றதாக போலீஸ் விசாரணையில் தெரியவந்துள்ளது.
வீட்டிற்கு வந்த சிறுமி தனக்கு நேர்ந்த கொடுமையை பாட்டியிடம் தெரிவித்துள்ளார். இதைக் கேட்டு அதிர்ச்சியடைந்த பாட்டி, சிறுமியை உடனடியாக மருத்துவமனைக்கு அழைத்துச் சென்றதுடன், சம்பந்தப்பட்ட இளைஞரைத் தேடி சென்றுள்ளார். மாணிக்கம் குளித்தலை பகுதியில் இருப்பதாக தகவல் கிடைத்ததை அடுத்து அங்கு சென்ற பாட்டி, அவரை பிடித்து காவல் நிலையத்திற்கு அழைத்துச் செல்ல முயன்றுள்ளார். அப்போது அவர் தப்பிச் செல்ல முயன்றதால், பாட்டி மறைத்து வைத்திருந்த அரிவாளை எடுத்து அவரை விரட்டிச் சென்று தாக்கியுள்ளார். இதில் மாணிக்கத்திற்கு உடலில் பல இடங்களில் வெட்டுக்காயங்கள் ஏற்பட்டுள்ளன.
சம்பவம் குறித்து தகவல் அறிந்த போலீசார் அங்கு சென்று, பாட்டியிடம் இருந்த அரிவாளை பறிமுதல் செய்தனர். அவரை காவல் நிலையத்திற்கு அழைத்துச் சென்று விசாரணை நடத்தினர். காயமடைந்த மாணிக்கம் குளித்தலை அரசு மருத்துவமனையில் சிகிச்சை பெற்று, பின்னர் மேல் சிகிச்சைக்காக திருச்சி அரசு மருத்துவமனைக்கு அனுப்பப்பட்டார். சிறுமியும் மருத்துவமனையில் சிகிச்சை பெற்றுள்ளார். இந்த சம்பவத்தில் சிறுமி மீதான பாலியல் வன்கொடுமை தொடர்பாக மாணிக்கம் மீது போக்சோ சட்டத்தின் கீழ் வழக்குப்பதிவு செய்யப்பட்டுள்ளதாக செய்திகளில் தெரிவிக்கப்பட்டுள்ளது. அதே நேரத்தில், பாட்டி நடத்திய தாக்குதல் குறித்தும் போலீசார் விசாரணை மேற்கொண்டு வருகின்றனர்.
இந்த சம்பவம் குறித்து அப்பகுதி மக்கள் கடும் அதிருப்தியையும் அதிர்ச்சியையும் வெளிப்படுத்தியுள்ளனர். பச்சிளம் குழந்தைக்கு எதிராக இப்படிப்பட்ட கொடுமையில் ஈடுபடுபவர்களுக்கு சட்டப்படி கடுமையான தண்டனை கிடைக்க வேண்டும் என்பதே பொதுமக்களின் முக்கிய கோரிக்கையாக உள்ளது. அதே நேரத்தில், குற்றங்களுக்கு எதிராக கோபம் இருந்தாலும் சட்டத்தை யாரும் கையில் எடுத்துக்கொள்ளாமல், குற்றவாளிகளுக்கு சட்டப்படி தண்டனை கிடைப்பதை உறுதி செய்வதே சரியான வழி என்றும் சமூக ஆர்வலர்கள் வலியுறுத்துகின்றனர்.
Also Read: “விபச்சாரம் செய்தாவது பணம் சம்பாதிச்சிட்டு வா!”… கர்ப்பிணி மனைவிக்கு கணவன் செய்த கொடூரம்!
