கேரள மாநிலத்தின் பல்வேறு பகுதிகளில் பெய்து வரும் கனமழை காரணமாக நிலச்சரிவு, மண் சரிவு மற்றும் திடீர் வெள்ளப்பெருக்கு ஏற்பட்டு பெரும் பாதிப்பு உருவாகியுள்ளது. இந்த சம்பவங்களில் இதுவரை 5 பேர் உயிரிழந்துள்ளனர், மேலும் 2 பேரைக் காணவில்லை. நிலைமை மோசமடைந்து வருவதையடுத்து, நிலவரத்தை மணிநேர அடிப்படையில் ஆய்வு செய்ய அதிகாரிகளுக்கு முதலமைச்சர் வி.டி. சதீசன் உத்தரவிட்டுள்ளார்.
SMS எச்சரிக்கை: முதலமைச்சர் அலுவலகம் ஞாயிற்றுக்கிழமை (செப்டம்பர் 20) வெளியிட்ட அறிக்கையில், முதலமைச்சரின் அறிவுறுத்தலின்படி, பேரிடர் மேலாண்மை ஆணைய ஆணையர் விக்னேஸ்வரி IAS, இடுக்கி மற்றும் கோட்டயம் மாவட்ட ஆட்சியர்களுடன் அவசரக் கூட்டம் நடத்தி நிலைமையை ஆய்வு செய்தார்.
இடுக்கி மற்றும் கோட்டயம் மாவட்ட மக்களுக்கு வானிலை குறித்த SMS எச்சரிக்கைகள் அனுப்பப்பட்டுள்ளன. மேலும், நிலைமையைக் கூர்ந்து கவனித்து, மக்களைப் பாதுகாப்பான இடங்களுக்கு அழைத்துச் செல்வது உள்ளிட்ட தேவையான நடவடிக்கைகளை எடுக்குமாறு மாவட்ட ஆட்சியர்களுக்கு அறிவுறுத்தப்பட்டுள்ளது.
மலப்புரம் மாவட்டம் நிலம்பூர்-அமரம்பலம் பகுதியில் உள்ள கோட்டப்புழா ஆற்றில் 5 பேர் வெள்ளத்தில் அடித்துச் செல்லப்பட்ட சம்பவத்தை அடுத்து, பேரிடர் மீட்புப் படையின் சிறப்புப் குழுவை உடனடியாக அப்பகுதிக்கு அனுப்பவும் முதலமைச்சர் உத்தரவிட்டுள்ளார்.
திடீர் வெள்ளம்: ஞாயிற்றுக்கிழமை மாலை மலப்புரம் மாவட்டம் நிலம்பூர்-அமரம்பலம் பகுதியில் உள்ள கோட்டப்புழா ஆற்றில் குளிக்கச் சென்ற 5 பேர் கொண்ட குழு, திடீரென ஏற்பட்ட வெள்ளப்பெருக்கில் அடித்துச் செல்லப்பட்டதில் 2 பேர் உயிரிழந்தனர்; 2 பேரைக் காணவில்லை.
வந்தூரிலிருந்து வந்திருந்த இந்த குழுவினர் ஆற்றில் குளித்துக் கொண்டிருந்தபோது, திடீரென நீர்மட்டம் உயர்ந்ததால் அடித்துச் செல்லப்பட்டனர். உள்ளூர்வாசி ஒருவர் ஒருவரை மீட்ட நிலையில், தீயணைப்பு மற்றும் மீட்புப் படையினர் இருவரின் உடல்களை மீட்டனர். காணாமல் போன இருவரைத் தேடும் பணி தீவிரமாக நடைபெற்று வருகிறது.
சென்னை பெண் பலி: கோட்டயம் மாவட்டம் தீக்கோய் அருகேயுள்ள வேளத்துச்சேரியில் ஞாயிற்றுக்கிழமை மாலை ஏற்பட்ட நிலச்சரிவில் சிக்கி, தமிழ்நாட்டைச் சேர்ந்த பெண் ஒருவர் உயிரிழந்தார்; அவருடன் சென்ற நண்பர் காயமடைந்தார். உயிரிழந்தவர் சென்னை ஜவஹர் நகரைச் சேர்ந்த சங்கீதா அருண் லால் (35) என அடையாளம் காணப்பட்டுள்ளார்.
சங்கீதாவும் அவரது நண்பரும் வாகமன்னிலிருந்து ஸ்கூட்டரில் திரும்பி வந்தபோது, சாலையில் சரிந்து விழுந்த மண் தாக்கியதில் இந்த விபத்து ஏற்பட்டது. சங்கீதாவின் நண்பர் காயங்களுடன் தப்பி மருத்துவமனையில் அனுமதிக்கப்பட்டுள்ளார்.
இதேபோல் ஞாயிற்றுக்கிழமை பிற்பகல், இடுக்கி மாவட்டம் கொட்டக்கம்பூரில் மழைக்காகக் கொட்டகையில் தஞ்சம் புகுந்த 3 பேர் நிலச்சரிவில் சிக்கினர். மலையிலிருந்து சரிந்து விழுந்த மண் கொட்டகையை மூடியதில் இருவர் உயிரிழந்தனர், காயமடைந்த ஒரு பெண் சிகிச்சைக்காக அனுமதிக்கப்பட்டுள்ளார்.
அடுத்த சில நாட்களுக்கு கனமழை எச்சரிக்கை: கேரளாவில் அடுத்த 4 நாட்களுக்குக் கனமழை பெய்யக்கூடும் என இந்திய வானிலை ஆய்வு மையம் (IMD) கணித்துள்ளது. செப்டம்பர் 20 மற்றும் 21 ஆகிய தேதிகளில் சில பகுதிகளில் இடி மின்னலுடன் கூடிய மழை பெய்ய வாய்ப்புள்ளது.
கோட்டயம் மற்றும் இடுக்கி மாவட்டங்களுக்கான மழை எச்சரிக்கை ‘ஆரஞ்சு’ அலர்ட்டாக உயர்த்தப்பட்டுள்ளது. (ஆரஞ்சு அலர்ட் என்பது 11 முதல் 20 செ.மீ வரையிலான மிகக் கனமழையைக் குறிக்கிறது; மஞ்சள் அலர்ட் என்பது 6 முதல் 11 செ.மீ வரையிலான கனமழையைக் குறிக்கிறது).
வானிலை மையத் தரவுகளின்படி, இந்த ஆண்டு கேரளாவில் பருவமழை இயல்பை விடக் குறைவாகவே இருந்துள்ளது. ஜூன் 1 முதல் செப்டம்பர் 17 வரையிலான காலத்தில், வழக்கமான மழையை விட 28 சதவீதம் குறைவான மழையே பதிவாகியுள்ளது.
