குடியரசுத் தலைவர் மற்றும் பிரதமர் மோடியை சந்திக்க முதலமைச்சர் முக.ஸ்டாலின் இன்று டெல்லி செல்வதாக தகவல்கள் வெளியாகியுள்ளன.
தமிழ்நாடு முதலமைச்சர் முக.ஸ்டாலின் இன்று டெல்லி பயணம் மேற்கொள்கிறார். டெல்லி செல்லும் முதலமைச்சர் நாளை பிரதமர் மோடியை சந்தித்து பேச உள்ளார். அப்போது, நீட் விலக்கு உள்ளிட்ட பல்வேறு கோரிக்கைகள் அடங்கிய மனுவை பிரதமரிடம் முதல்வர் முக.ஸ்டாலின் அளிக்க உள்ளதாக கூறப்படுகிறது. இந்த சந்திப்பின்போது, தமிழகத்துக்கு வரவேண்டிய நிலுவைத் தொகைகள், ஜிஎஸ்டி இழப்பீட்டை நீட்டிப்பது, மத்திய அரசின் மின்சார சட்டத்திருத்தம், நீட் தேர்வில் தமிழகத்துக்கு விலக்கு அளிப்பது தொடர்பாக குடியரசுத் தலைவரிடம் இருக்கும் மசோதாவுக்கு ஒப்புதல் அளிப்பது தொடர்பாகவும், தமிழகத்துக்கு தேவையான புதிய திட்டங்கள் குறித்தும் பிரதமர் மோடியிடம் முதலமைச்சர் முக.ஸ்டாலின் வலியுறுத்த இருப்பதாகவும் கூறப்படுகிறது.
அதன் பின்னர் குடியரசுத் தலைரவராக பொறுப்பேற்றுள்ள திரௌபதி முர்மு மற்றும் துணை குடியரசு தலைவராக பொறுப்பேற்றுள்ள ஜெகதீப் தன்கரை முதலமைச்சர் முக.ஸ்டாலின், சந்தித்து வாழ்த்து தெரிவிக்க உள்ளதாகவும் தகவல்கள் வெளியாகியுள்ளன.
