அமைச்சர் உதயநிதி ஸ்டாலினுக்கு கை கொடுக்க வந்த திமுக தொண்டரை சட்டையை பிடித்து ஓங்கி அடித்து அங்கிருந்து தள்ளிய அமைச்சர் கே.என்.நேருவின் வீடியோ சமூக வலைதளங்களில் வைரலாகி சர்ச்சையை கிளப்பியுள்ளது.
சேலம் மாவட்டம் ஆத்தூர் அருகே தலைவாசல் பகுதியில் விளையாட்டுத்துறை அமைச்சர் உதயநிதிக்கு திமுக சார்பில் வரவேற்பு அளிக்கும் நிகழ்ச்சி நடைபெற்றது. கட்சியினர் அமைச்சரை வரவேற்று சால்வை அணிவித்து கொண்டிருந்தனர். உதயநிதி ஸ்டாலின் அருகே அமைச்சர் கே.என்.நேரு நின்று கொண்டிருந்தார். வரிசையாக திமுக தொண்டர்கள் சென்று உதயநிதிக்கு சால்வை கொடுத்து அவருக்கு வணக்கம் வைத்து விட்டு செல்கின்றனர். ஒரு தொண்டர் உதயநிதிக்கு கை கொடுக்க முயன்ற போது அமைச்சர் நேரு அவரை ஓங்கி அடித்து சட்டையை பிடித்து தள்ளினார். அப்போதும் ஆத்திரம் தீராமல் பின்பக்கமாக கழுத்தை பிடித்து அங்கிருந்து தள்ளினார்.
இது தொடர்பான வீடியோ தற்போது சமூக வலைத்தளங்களில் வைரலாகி வருகிறது. சில நாட்களுக்கு முன்பு முதலமைச்சர் முக.ஸ்டாலின் பங்கேற்க சென்ற நிகழ்ச்சிக்கு ஆய்வுக்கு சென்ற பால்வளத்துறை அமைச்சர் நாசர், தனக்கு நாற்காலி தரவில்லையென்று கட்சி தொண்டர் ஒருவரை மண்ணாங்கட்டியால் அடித்த காட்சி இணையத்தில் வைரலாகி கடும் விமர்சனத்தை சந்தித்தது.
