பல நூற்றாண்டுகளாக மனித மூளை ஒரே உறுப்பாகவே அறிவியல் உலகில் கருதப்பட்டு வந்தது. ஆனால், ஸ்டான்போர்டு மருத்துவப் பள்ளி விஞ்ஞானிகள் மேற்கொண்ட புதிய ஆய்வு, மூளையின் வளர்ச்சி குறித்த இந்தப் புரிதலில் முக்கிய மாற்றத்தை ஏற்படுத்தியுள்ளது. மனித மூளை உண்மையில் தனித்தனியாக உருவான இரண்டு பழமையான நரம்பு அமைப்புகளின் இணைப்பாக இருக்கலாம் என்பதை ஆய்வு சுட்டிக்காட்டுகிறது.
இந்த ஆய்வு Nature Neuroscience இதழில் செப்டம்பர் 18ஆம் தேதி வெளியானது. மூளையின் வளர்ச்சியைப் பற்றிய புதிய புரிதல், குறிப்பாக மூளைத்தண்டை பாதிக்கும் ஸ்பைனல் மஸ்குலர் அட்ரோபி (SMA), அமியோட்ரோபிக் லேட்டரல் ஸ்க்ளெரோசிஸ் (ALS) போன்ற நரம்பியல் நோய்களை ஆய்வு செய்வதற்கான புதிய வாய்ப்புகளை உருவாக்கும் என ஆராய்ச்சியாளர்கள் தெரிவித்துள்ளனர்.
மூளையில் முக்கியமாக முன்மூளை, நடுமூளை, பின்மூளை என மூன்று பகுதிகள் உள்ளன. முன்மூளை மொழி, சிந்தனை, விழிப்புணர்வு மற்றும் சிக்கலான முடிவெடுப்பு போன்ற உயர்நிலை செயல்பாடுகளில் முக்கிய பங்கு வகிக்கிறது. இதற்கு மாறாக, பின்மூளை அல்லது மூளைத்தண்டு சுவாசம், இதயத் துடிப்பு, தூக்கம், பசி போன்ற உடலின் தன்னியக்க செயல்பாடுகளை கட்டுப்படுத்துகிறது. முகம், நாக்கு மற்றும் தொண்டை தசைகளின் இயக்கத்திலும் பின்மூளை சார்ந்த நரம்புகள் முக்கிய பங்கு வகிக்கின்றன.
இதுவரை, மூளையின் அனைத்து பகுதிகளும் கருவின் ஆரம்ப வளர்ச்சியில் ஒரே முன்னோடி உயிரணுவிலிருந்து உருவாகின்றன என்ற கருத்து நிலவி வந்தது. ஆனால், புதிய ஆய்வில் முன்மூளை மற்றும் நடுமூளை உருவாகும் பாதையும், பின்மூளை உருவாகும் பாதையும் ஆரம்பத்திலேயே தனித்தனியாக இருப்பது கண்டறியப்பட்டுள்ளது.
ஆராய்ச்சியாளர்கள் எலிகளின் கரு வளர்ச்சியை ஆய்வு செய்தபோது இரண்டு வேறுபட்ட மூளை முன்னோடி உயிரணுக்களை அடையாளம் கண்டனர். Otx2 என்ற மரபணுவை வெளிப்படுத்தும் ஒரு வகை உயிரணுக்கள் முன்மூளை மற்றும் நடுமூளையாக வளர்கின்றன. Gbx2 என்ற மரபணுவை வெளிப்படுத்தும் மற்றொரு வகை உயிரணுக்கள் பின்மூளையாக உருவாகின்றன. இந்த இரண்டு உயிரணுக் குழுக்களும் வளர்ச்சியின் ஆரம்ப கட்டத்திலிருந்தே ஒன்றுடன் ஒன்று கலக்காமல் தனித்தனி பாதையில் பயணிப்பதை ஆய்வாளர்கள் கண்டறிந்தனர்.
இதனுடன், இந்த உயிரணுக்களில் உள்ள டிஎன்ஏ எவ்வாறு தொகுக்கப்பட்டுள்ளது என்பதையும் ஆராய்ச்சியாளர்கள் ஆய்வு செய்தனர். முன்பகுதி மற்றும் பின்பகுதி நரம்பு திசுக்களில் குரோமாட்டின் அமைப்பிலும் குறிப்பிடத்தக்க வேறுபாடு இருப்பது தெரியவந்தது. இதன் காரணமாக ஒவ்வொரு உயிரணுக் குழுவும் குறிப்பிட்ட மூளைப் பகுதியாக உருவாகும் பாதையில் ஆரம்பத்திலேயே நிலைபெறுகிறது.
இந்தக் கண்டுபிடிப்பு, ஆய்வகத்தில் பின்மூளை நரம்பு உயிரணுக்களை உருவாக்குவதில் விஞ்ஞானிகள் நீண்ட காலமாக எதிர்கொண்ட சிக்கலுக்கும் விளக்கம் அளிக்கிறது. ஒரு வகை முன்னோடி உயிரணுவை மற்றொரு வகை மூளை உயிரணுவாக மாற்ற முயற்சித்ததால் முந்தைய முயற்சிகளில் சிக்கல் ஏற்பட்டிருக்கலாம் என ஆராய்ச்சியாளர்கள் கருதுகின்றனர்.
புதிய புரிதலின் அடிப்படையில், மனித ப்ளூரிபோடென்ட் ஸ்டெம் செல்களைப் பயன்படுத்தி ஆய்வகத்தில் செயல்படும் பின்மூளை மோட்டார் நியூரான்களை உருவாக்குவதிலும் ஆராய்ச்சியாளர்கள் வெற்றி பெற்றுள்ளனர். இந்த செயற்கையாக உருவாக்கப்பட்ட நரம்பு உயிரணுக்கள் இயல்பான பின்மூளை நரம்பு உயிரணுக்களின் முக்கிய பண்புகளை வெளிப்படுத்தின. அவற்றில் மின் செயல்பாடும் காணப்பட்டது. முகம் மற்றும் விழுங்கும் தசைகளை கட்டுப்படுத்தும் பின்மூளைப் பகுதிகளுடன் தொடர்புடைய புரதங்களும் உருவானது.
இந்த கண்டுபிடிப்பு நரம்பியல் நோய்களுக்கான ஆராய்ச்சியில் முக்கியத்துவம் பெறுகிறது. ஸ்பைனல் மஸ்குலர் அட்ரோபி (SMA) மற்றும் ALS போன்ற நோய்களில் மூளைத்தண்டைச் சேர்ந்த குறிப்பிட்ட நரம்பு உயிரணுக்கள் படிப்படியாக செயலிழக்கின்றன. இதனால் விழுங்குவதிலும், பின்னர் சுவாசிப்பதிலும் சிக்கல்கள் ஏற்படலாம். உயிருடன் இருக்கும் நோயாளிகளிடமிருந்து மூளைத்தண்டு திசுக்களை நேரடியாகப் பெறுவது சாத்தியமில்லாத நிலையில், ஆய்வகத்தில் குறிப்பிட்ட நரம்பு உயிரணுக்களை உருவாக்கும் திறன் நோயின் செயல்முறையை ஆய்வு செய்ய உதவும்.
இந்த இரண்டு தனித்தனி நரம்பு அமைப்புகளின் தோற்றம் மனிதர்களுக்கு மட்டும் உரியது அல்ல என்பதையும் ஆய்வாளர்கள் கண்டறிந்துள்ளனர். கோழி, ஜீப்ராஃபிஷ் உள்ளிட்ட உயிரினங்களிலும் இதேபோன்ற இரட்டை தோற்ற அமைப்பு காணப்பட்டது. சுமார் 550 மில்லியன் ஆண்டுகள் வரையிலான பரிணாம வளர்ச்சியையும் ஆய்வு செய்தபோது, மனிதர்களுடன் தொலைதூர பரிணாமத் தொடர்பு கொண்ட acorn worm எனப்படும் கடல்வாழ் உயிரினங்களிலும் இதற்கான தடயங்கள் கண்டறியப்பட்டன.
மூளையின் பின்பகுதியில் உள்ள நரம்பு சுற்றுகள் பசி மற்றும் உணவு உட்கொள்ளும் செயல்பாடுகளையும் கட்டுப்படுத்துகின்றன. இதனால், உடல் எடை குறைப்புக்குப் பயன்படுத்தப்படும் செமக்ளூடைடு போன்ற மருந்துகள் செயல்படும் விதத்தைப் புரிந்துகொள்வதற்கும் இந்த ஆய்வு எதிர்காலத்தில் தொடர்புடையதாக இருக்கலாம் என ஆராய்ச்சியாளர்கள் குறிப்பிடுகின்றனர்.
அடுத்தகட்டமாக, முதுகுத் தண்டின் வளர்ச்சி எவ்வாறு நடைபெறுகிறது என்பதையும், SMA மற்றும் ALS போன்ற நோய்கள் பின்மூளை நரம்பு உயிரணுக்களின் செயல்பாட்டை எந்த வழிகளில் பாதிக்கின்றன என்பதையும் ஆய்வு செய்ய விஞ்ஞானிகள் திட்டமிட்டுள்ளனர். இதன் மூலம் மூளைத்தண்டு தொடர்பான நோய்களைப் புரிந்துகொள்வதற்கும், எதிர்காலத்தில் புதிய சிகிச்சை அணுகுமுறைகளை உருவாக்குவதற்கும் புதிய ஆய்வு வாய்ப்புகள் கிடைக்கலாம்.
Also Read: ராஞ்சி மதுக்கடைக்குள் புகுந்த குரங்கு..! பாதி பாட்டில் மதுவை குடித்துவிட்டு மயங்கி விழுந்தது..!
