ஆரோக்கியமற்ற உணவுப் பழக்கம் மற்றும் வாழ்க்கை முறையால் பல்வேறு உடல்நலப் பிரச்சனைகள் ஏற்படுகின்றன. அதில் தற்போது பலரையும் பாதிக்கும் முக்கிய பிரச்சனையாக அதிகரித்து வரும் கொலஸ்ட்ரால் உள்ளது. குறிப்பாக உடலில் கெட்ட கொலஸ்ட்ரால் எனப்படும் LDL அளவு அதிகரிக்கும்போது, இதய நோய், மாரடைப்பு மற்றும் பக்கவாதம் உள்ளிட்ட பாதிப்புகளின் அபாயம் அதிகரிக்கலாம்.
கொலஸ்ட்ரால் அதிகமாக இருப்பதால் சிலர் இரவு உணவைத் தவிர்ப்பதை வழக்கமாகக் கொண்டுள்ளனர். இரவு உணவை சாப்பிடாமல் இருப்பதால் உடல் எடை குறையும், கொலஸ்ட்ரால் கட்டுக்குள் வரும் என்று அவர்கள் நினைக்கின்றனர். ஆனால், இரவு உணவை மட்டும் தவிர்ப்பதால் கொலஸ்ட்ரால் அளவு குறைந்துவிடும் என்று கூற முடியாது.
உடலுக்கு குறிப்பிட்ட அளவு கொலஸ்ட்ரால் அவசியமானது. ஆனால், கெட்ட கொலஸ்ட்ரால் மற்றும் மொத்த கொலஸ்ட்ரால் அளவு அதிகரித்தால் உடல்நலப் பிரச்சனைகள் ஏற்பட வாய்ப்புள்ளது. ஒருவரின் கொலஸ்ட்ரால் அளவு, அவர் இரவு உணவை சாப்பிடுகிறாரா இல்லையா என்பதை மட்டும் அடிப்படையாகக் கொண்டது அல்ல. நாள் முழுவதும் எடுத்துக்கொள்ளும் உணவு, மொத்த கலோரி அளவு, உடல் எடை மற்றும் உடற்பயிற்சி போன்ற பல காரணிகள் கொலஸ்ட்ரால் அளவில் தாக்கத்தை ஏற்படுத்துகின்றன.
சிலருக்கு இரவு நேரத்தில் உணவின் அளவைக் குறைப்பது அல்லது லேசான உணவை எடுத்துக்கொள்வது பயனுள்ளதாக இருக்கலாம். குறிப்பாக, இதன் மூலம் நாள் முழுவதும் எடுத்துக்கொள்ளும் மொத்த கலோரி குறைந்து, உடலின் இன்சுலின் செயல்பாடு மேம்பட்டால், காலப்போக்கில் கெட்ட கொலஸ்ட்ரால் அளவைக் கட்டுப்படுத்த உதவலாம். இருப்பினும், இந்தப் பலன் அனைவருக்கும் ஒரே மாதிரியாக கிடைக்கும் என்று கூற முடியாது.
மருத்துவரின் ஆலோசனை இல்லாமல் இரவு உணவை முற்றிலும் நிறுத்துவது சரியான நடைமுறை அல்ல. இரவில் பசியுடன் உணவைத் தவிர்ப்பதால், அடுத்த நாள் அதிகமாக சாப்பிடும் நிலை ஏற்படலாம். இதனால் உடல் எடை அதிகரிப்பதுடன், கொலஸ்ட்ரால் அளவும் பாதிக்கப்பட வாய்ப்புள்ளது. மேலும், தொடர்ந்து இரவு உணவைத் தவிர்ப்பது உடலுக்குத் தேவையான சில ஊட்டச்சத்துக்கள் கிடைப்பதில் குறைபாட்டை ஏற்படுத்தலாம்.
கொலஸ்ட்ராலை கட்டுக்குள் வைத்திருக்க தினசரி உணவுப் பழக்கத்தில் கவனம் செலுத்துவது முக்கியம். பழங்கள், கீரைகள், காய்கறிகள், போதுமான புரதம் மற்றும் வைட்டமின்கள் நிறைந்த உணவுகளை உணவில் சேர்த்துக்கொள்ளலாம். அதிக கொழுப்பு உள்ள உணவுகளை குறைப்பதுடன், நெய், வெண்ணெய் மற்றும் அதிகமாக பதப்படுத்தப்பட்ட உணவுகளை முடிந்தவரை தவிர்ப்பது நல்லது.
இதனுடன், வாரத்தில் குறைந்தது 5 நாட்கள், தினமும் 30 முதல் 45 நிமிடங்கள் வரை உடற்பயிற்சி செய்வதும் உடல் ஆரோக்கியத்திற்கு உதவும். கொலஸ்ட்ராலை குறைப்பதற்கான மருந்துகளை மருத்துவரின் ஆலோசனை இல்லாமல் தானாக எடுத்துக்கொள்ளக் கூடாது. கொலஸ்ட்ரால் அளவு அதிகமாக இருப்பதாக சந்தேகம் இருந்தால், முறையான பரிசோதனை செய்து மருத்துவரின் ஆலோசனைப்படி உணவு மற்றும் வாழ்க்கை முறையில் மாற்றங்களை மேற்கொள்வதே பாதுகாப்பான அணுகுமுறையாகும்.
Also Read: சாணக்கியர் கூறும் 3 முக்கிய வாழ்க்கைப் பாடங்கள்… மதிப்பும் மரியாதையும் கிடைக்க இதை கடைப்பிடிங்க!
