தமிழக அரசியல் களம் தற்போது ஒரு முக்கியமான திருப்புமுனையை எதிர்கொண்டு வருகிறது. நீண்டகாலமாக இணைந்து செயல்பட்டு வந்த திராவிட முன்னேற்ற கழகம் – இந்திய தேசிய காங்கிரஸ் கூட்டணி, தற்போது உள்ளக முரண்பாடுகள் மற்றும் அரசியல் கணக்கீடுகளால் சீர்குலையும் நிலையைக் காட்டுகிறது. கொள்கை ஒற்றுமையோ அல்லது மக்கள் நலனோ இல்லாமல், வெறும் அதிகாரப் பசிக்காக மட்டுமே கூட்டணி அமைக்கப்பட்டதாக அரசியல் விமர்சகர்கள் கருதுகின்றனர்.
தேர்தல் அறிக்கையில் முரண்பாடு: வலுவான எந்த கூட்டணியும் பொதுவான செயல்திட்டத்தைக் கொண்டு செயல்படும் என்பது அரசியல் நெறி. ஆனால் திமுக மற்றும் காங்கிரஸ் கட்சிகளின் தேர்தல் அறிக்கைகள் ஒன்றுக்கொன்று பொருந்தாதவையாக, தனித்தனியாகவே அமைந்துள்ளன என்பது விமர்சனமாக கூறப்படுகிறது. தமிழக மக்களுக்காக காகிதத்தில் கூட ஒன்றுபட முடியாத இக்கட்சிகள், நாளைய ஆட்சியில் எவ்வாறு இணைந்து செயல்படப் போகின்றன என்ற கேள்வி எழுகிறது.
தொகுதிப் பங்கீட்டில் ஏற்பட்ட தாமதம், கூட்டணிக்குள் நிலவும் அவநம்பிக்கையை வெளிப்படையாக காட்டுகிறது. அமைச்சரவையில் காங்கிரஸுக்கு இடமில்லை என திமுக உறுதியாக தெரிவித்திருப்பது, இந்த உறவின் தன்மையை மேலும் கேள்விக்குறியாக்கியுள்ளது. இதனால், இது இயல்பான அரசியல் கூட்டணியாக அல்லாமல், வலுக்கட்டாயமாக இணைக்கப்பட்ட உறவு போலவே தோன்றுகிறது.
ஒருமித்தி கருத்து இல்லை: ராகுல் காந்தி “இந்தியா (INDI) கூட்டணி” எனக் குறிப்பிடும் போது, ஸ்டாலின் அதனை மறுத்து “மதச்சார்பற்ற முற்போக்குக் கூட்டணி (SPA)” என்றே வலியுறுத்துகிறார். சொந்த கூட்டணிக்கே பெயர் சூட்டுவதிலேயே இவ்வளவு குழப்பம் நிலவினால், தமிழகத்தின் எதிர்காலத்திற்கான தெளிவான பாதையை எவ்வாறு உருவாக்க முடியும் என்ற கேள்வி எழுகிறது. இதனால், இது ஒருங்கிணைந்த கூட்டணியாக அல்லாமல், குழப்பத்தின் முழுமையான பிரதிபலிப்பாகவே தோன்றுகிறது.
ஸ்டாலின் – ராகுல் இடையே நெருக்கம் மங்கிவிட்டதா: ஒரு கூட்டணியின் வலிமை அதன் தலைவர்கள் ஒருங்கிணைந்து செயல்படுவதில்தான் உள்ளது. ஆனால், ராகுல் காந்தி மற்றும் மு.க. ஸ்டாலின் ஆகியோர் ஒரே மேடையில் தோன்றுவதைத் திட்டமிட்டே தவிர்க்கிறார்கள். சமீபத்தில் மகளிர் இடஒதுக்கீடு மசோதா குறித்து பேசும் போது, மம்தா பானர்ஜிக்கு நன்றி தெரிவித்த ராகுல் காந்தி, ஸ்டாலினை குறிப்பிடாதது கவனத்தை ஈர்த்துள்ளது.
இந்த இடைவெளி மேடை மொழிபெயர்ப்பிலும் பிரதிபலித்ததாக கூறப்படுகிறது. ராகுல் காந்தி ஸ்டாலினை “சகோதரர்” என்று குறிப்பிட்டதை, தமிழாக்கம் செய்த தமிழக காங்கிரஸ் தலைவர் தவிர்த்தது பேசுபொருளானது. இதன் மூலம், அவர்களுக்குள் இருந்ததாகக் கருதப்பட்ட நெருக்கமும் “சகோதரத்துவ” உணர்வும் மங்கிவிட்டதா என்ற கேள்வி எழுகிறது.
உள்கட்சி மோதல்: உள்கட்சி மோதல்களும் “திராவிட மாடல்” குறித்த விமர்சனங்களும் இந்த கூட்டணிக்குள் வெளிப்படையாகத் தலைதூக்குகின்றன. காங்கிரஸ் மூத்த தலைவர்கள் திமுகவை திறந்தவெளியில் விமர்சிக்க, மறுபுறம் வாக்குச்சாவடிகளில் பணியாற்ற ஆட்கள் கூட இல்லாத கட்சி காங்கிரஸ் என திமுகவினர் எள்ளி பேசுகின்றனர். இதன் உச்சமாக, கூட்டணியில் உள்ள தேமுதிக தலைவர் பிரேமலதா விஜயகாந்த், முதல்வர் ஸ்டாலின் முன்னிலையிலேயே தமிழகத்தில் பெண்களுக்கு எதிரான குற்றங்கள் மற்றும் போதைப்பொருள் புழக்கம் அதிகரித்துள்ளதாக குற்றம்சாட்டியது,
NDA கூட்டணி: இந்த குழப்பநிலைக்கு நேர்மாறாக, தேசிய ஜனநாயகக் கூட்டணி (NDA) பிரதமர் நரேந்திர மோடி தலைமையில் ஒற்றை இயந்திரம் போல கட்டுக்கோப்பாக செயல்படுகிறது. எடப்பாடி பழனிசாமி, அண்ணாமலை, அன்புமணி ராமதாஸ், டி.டி.வி தினகரன், ஜி.கே. வாசன் போன்ற தலைவர்கள் ஒரே நோக்குடன் இணைந்து செயல்படுகின்றனர் எனக் கூறப்படுகிறது. இது வெறும் கட்சிகளின் கூட்டணியாக அல்லாமல், தமிழக முன்னேற்றத்தை நோக்கி செயல்படும் சக்திகளின் ஒருங்கிணைப்பாக விளக்கப்படுகிறது.
இதற்கிடையில், “இந்தியா கூட்டணி” குறித்து எழும் விமர்சனங்களும், “தேசிய ஜனநாயகக் கூட்டணி” முன்னிறுத்தும் வளர்ச்சி அரசியலும் ஆகியவற்றுக்கிடையில் தேர்வு செய்ய வேண்டிய சூழல் உருவாகியுள்ளது என்ற அரசியல் கருத்தும் முன்வைக்கப்படுகிறது. தமிழகத்தின் எதிர்காலம் எந்த திசையில் நகர வேண்டும் என்பதில் மக்கள் தீர்மானிக்கும் காலகட்டம் இது என்ற பார்வையும் வலியுறுத்தப்படுகிறது.
Read more: அனைத்து அரசு மருத்துவமனைகளிலும் Heat Stroke சிறப்பு வார்டு.. தமிழக அரசு அதிரடி உத்தரவு..!
