இரவில் நன்றாக தூங்கிக்கொண்டிருக்கும்போது திடீரென தூக்கம் கலைந்து எழுகிறீர்கள். அப்போது இதயம் வழக்கத்தைவிட வேகமாக துடிப்பதை உணர்கிறீர்கள். சில விநாடிகளில் அந்த படபடப்பு குறைந்து இதயத்துடிப்பு இயல்பு நிலைக்கு திரும்பிவிடுகிறது. இதுபோன்ற அனுபவம் பலருக்கும் அவ்வப்போது ஏற்படலாம். ஆனால் இதற்கான காரணம் என்ன என்ற கேள்வி எழுவது இயல்புதான்.
தூக்கத்தில் இருந்து திடீரென எழும்போது உடல் தூக்க நிலையில் இருந்து விழிப்பு நிலைக்கு மாறுகிறது. இந்த மாற்றத்தின் போது உடலின் ‘ஃபைட் ஆர் ஃப்ளைட்’ எனப்படும் அவசர எதிர்வினை செயல்படலாம். இதனால் அட்ரினலின் அதிகரித்து, சிறிது நேரத்திற்கு இதயத்துடிப்பு வேகமாகலாம்.
பயமுறுத்தும் கனவு அல்லது மிகவும் தெளிவான கனவில் இருந்து எழும்போதும் இதுபோன்ற படபடப்பு ஏற்படலாம். கனவின் காரணமாக ஏற்பட்ட பயம் அல்லது பதற்றம், விழித்த பிறகும் சில நேரம் உடலில் தாக்கத்தை ஏற்படுத்தும். இதனால் இதயம் வேகமாக துடிக்கலாம்.
மன அழுத்தம், பதற்றம், போதுமான தூக்கமின்மை, உடலில் நீர்ச்சத்து குறைவது போன்றவையும் இரவில் இதயத்துடிப்பு அதிகரிக்க காரணமாக இருக்கலாம். இரவு நேரத்தில் காபி, டீ உள்ளிட்ட காஃபின் பானங்களை அதிகமாக குடிப்பதும் சிலருக்கு இதே பிரச்சனையை ஏற்படுத்தலாம்.
பொதுவாக, தூக்கத்தில் இருந்து எழுந்ததும் சில விநாடிகள் இதயம் வேகமாக துடித்து பின்னர் இயல்பு நிலைக்கு திரும்புவது மட்டும் இருந்தால், அது உடலின் தற்காலிக எதிர்வினையாக இருக்கலாம். ஆனால் இதுபோன்ற சம்பவங்கள் அடிக்கடி நடக்கிறதா என்பதையும், ஒவ்வொரு முறையும் எவ்வளவு நேரம் நீடிக்கிறது என்பதையும் கவனிக்க வேண்டும்.
இதயத்துடிப்பு நீண்ட நேரம் தொடர்ந்து வேகமாக இருப்பது, காரணமே இல்லாமல் அடிக்கடி ஏற்படுவது அல்லது இதயம் ஒழுங்கற்ற முறையில் துடிப்பதை உணர்வது போன்ற அறிகுறிகள் இருந்தால், இதயத்தின் துடிப்பு தொடர்பான பிரச்சனைகளையும் பரிசோதிக்க வேண்டியிருக்கும். ஏட்ரியல் ஃபைப்ரிலேஷன், சூப்பர்வென்ட்ரிகுலர் டாக்கிகார்டியா போன்ற சில இதயத் துடிப்பு கோளாறுகளும் இதற்கு காரணமாக இருக்கலாம்.
இதனுடன் நெஞ்சுவலி, மூச்சுத்திணறல், தலைச்சுற்றல், மயக்கம், அதிகப்படியான வியர்வை அல்லது கடுமையான பலவீனம் போன்ற அறிகுறிகள் ஏற்பட்டால் உடனடியாக மருத்துவ உதவியை நாட வேண்டும்.
இதுபோன்ற பிரச்சனை தொடர்ந்து இருந்தால், மருத்துவர் ECG பரிசோதனை மூலம் இதயத்தின் செயல்பாட்டை பரிசோதிக்கலாம். அறிகுறிகள் அவ்வப்போது மட்டுமே ஏற்படும் நிலையில், Holter monitor போன்ற கருவி மூலம் நீண்ட நேரம் இதயத்துடிப்பை பதிவு செய்யலாம். தேவைக்கேற்ப ரத்தப் பரிசோதனை அல்லது எக்கோ பரிசோதனையும் மேற்கொள்ளப்படலாம்.
எனவே, இரவில் தூக்கம் கலைந்து எழுந்ததும் சிறிது நேரம் இதயம் வேகமாக துடிப்பது மட்டும் இருந்தால் உடனடியாக அச்சப்பட வேண்டியதில்லை. ஆனால் அது தொடர்ந்து அல்லது அடிக்கடி ஏற்பட்டால், குறிப்பாக வேறு அறிகுறிகளும் சேர்ந்தால், மருத்துவரிடம் பரிசோதனை செய்வது முக்கியம்.
Also Read: ராஞ்சி மதுக்கடைக்குள் புகுந்த குரங்கு..! பாதி பாட்டில் மதுவை குடித்துவிட்டு மயங்கி விழுந்தது..!
