அன்றாட உணவில் அல்ட்ரா-பிராசஸ்டு உணவுகள் (Ultra-Processed Foods) அதிகரித்து வரும் நிலையில், அவற்றை அதிகமாக சாப்பிடுவது பல்வேறு நீண்டகால உடல்நலப் பிரச்சினைகளுடன் தொடர்புடையதாக புதிய ஆய்வு சுட்டிக்காட்டியுள்ளது. குறிப்பாக, தினசரி உணவில் கூடுதலாக 100 கிராம் அல்ட்ரா-பிராசஸ்டு உணவுகளை சேர்ப்பவர்களுக்கு இதய நோய் பாதிப்புகள் ஏற்படும் அபாயம் 14 சதவீதம் அதிகமாக இருந்தது.
Family Medicine and Community Health இதழில் வெளியான இந்த ஆய்வு, 51 நீண்டகால ஆய்வுகளின் தரவுகளை அடிப்படையாகக் கொண்டது. அமெரிக்கா, ஐரோப்பா, ஆசியா மற்றும் ஓசியானியா உள்ளிட்ட பகுதிகளைச் சேர்ந்த சுமார் 88 லட்சம் பெரியவர்களின் உடல்நலம் மற்றும் உணவுப் பழக்கங்கள் இதில் ஆய்வு செய்யப்பட்டன. பங்கேற்பாளர்கள் 2 முதல் 32 ஆண்டுகள் வரை கண்காணிக்கப்பட்டனர்.
அல்ட்ரா-பிராசஸ்டு உணவுகளை அதிகம் உட்கொள்வோரிடம் உடல் பருமன் அல்லது அதிக உடல் எடை ஏற்படும் அபாயம் 23 சதவீதம் அதிகமாக இருந்தது. அதேபோல், மெட்டபாலிக் சிண்ட்ரோம் அல்லது நீரிழிவு தொடர்பான பாதிப்புகளின் அபாயம் 24 சதவீதமும், மனச்சோர்வு மற்றும் பதற்றம் தொடர்பான பிரச்சினைகளின் அபாயம் 27 சதவீதமும் அதிகமாக இருந்தது.
செரிமான மண்டலம் தொடர்பான நோய்களின் அபாயம் 31 சதவீதம் அதிகமாக இருந்ததுடன், புற்றுநோய் ஏற்படும் அபாயம் 12 சதவீதமும், எந்தவொரு காரணத்தாலும் உயிரிழக்கும் அபாயம் 18 சதவீதமும் அதிகமாக இருந்தது.
தினசரி உணவில் கூடுதலாக 100 கிராம் அல்ட்ரா-பிராசஸ்டு உணவுகளை எடுத்துக்கொள்வதை தனியாகப் பார்த்தபோது, உயர் ரத்த அழுத்தம் ஏற்படும் அபாயம் 11 சதவீதமும், இதய நோய் தொடர்பான பாதிப்புகள் ஏற்படும் அபாயம் 14 சதவீதமும் அதிகரித்தது. புற்றுநோய் அபாயம் 4 சதவீதமும், எந்தவொரு காரணத்தாலும் உயிரிழக்கும் அபாயம் 3 சதவீதமும் அதிகரித்தது.
மேலும், உணவில் இருந்து கிடைக்கும் எடை அல்லது மொத்த ஆற்றல் அளவில் 10 சதவீதம் அதிகரிப்பு ஏற்பட்டபோது, மெட்டபாலிக் சிண்ட்ரோம் மற்றும் நீரிழிவு தொடர்பான பாதிப்புகளின் அபாயம் 16 சதவீதம் அதிகமாக இருந்தது.
பாக்கெட்டில் அடைக்கப்பட்ட பல ஸ்நாக்ஸ், சர்க்கரை அதிகம் உள்ள பானங்கள், உடனடியாக சாப்பிடக்கூடிய அல்லது சூடுபடுத்தி சாப்பிடக்கூடிய சில உணவுகள் உள்ளிட்டவை அதிக அளவில் பதப்படுத்தப்பட்ட உணவுகளின் வகையில் வருகின்றன. இவற்றில் உப்பு, சர்க்கரை, கொழுப்பு மற்றும் கலோரிகள் அதிகமாகவும், நார்ச்சத்து, புரதம், வைட்டமின்கள் மற்றும் தாதுக்கள் குறைவாகவும் இருக்க வாய்ப்புள்ளது.
இத்தகைய உணவுகள் குடலில் உள்ள நுண்ணுயிரிகளின் சமநிலை, உடலில் ஏற்படும் அழற்சி மற்றும் இன்சுலின் செயல்பாடு போன்றவற்றில் தாக்கத்தை ஏற்படுத்தக்கூடும் என்பது ஆய்வில் விவாதிக்கப்பட்டுள்ளது. இருப்பினும், இந்த ஆய்வு அல்ட்ரா-பிராசஸ்டு உணவுகளே நேரடியாக அனைத்து நோய்களுக்கும் காரணம் என்பதை நிரூபிக்கவில்லை. உணவுப் பழக்கம், உடற்பயிற்சி, உடல் எடை மற்றும் பிற வாழ்க்கைமுறை காரணிகளும் உடல்நலத்தில் தாக்கம் ஏற்படுத்தக்கூடும்.
எனவே, தினசரி உணவில் அல்ட்ரா-பிராசஸ்டு உணவுகளின் அளவைக் குறைத்து, காய்கறிகள், பழங்கள், முழு தானியங்கள், பருப்பு வகைகள், புரதச்சத்து நிறைந்த உணவுகள் போன்ற இயற்கையான அல்லது குறைவாக பதப்படுத்தப்பட்ட உணவுகளுக்கு முக்கியத்துவம் கொடுப்பது உடல்நலத்திற்கு பயனுள்ளதாக இருக்கும்.
Also Read: ராஞ்சி மதுக்கடைக்குள் புகுந்த குரங்கு..! பாதி பாட்டில் மதுவை குடித்துவிட்டு மயங்கி விழுந்தது..!
