இன்றைய காலகட்டத்தில் பலரும் நீண்ட நேரம் அமர்ந்தே வேலை செய்யும் வாழ்க்கை முறையை கடைபிடித்து வருகின்றனர். இதனால் உடல் சோர்வு, மந்தநிலை உள்ளிட்ட பிரச்சனைகள் அதிகரித்து வருகின்றன. ஆனால், தினமும் வெறும் 10 நிமிட நடைப்பயிற்சி போன்ற சிறிய பழக்கங்களே உடல் மற்றும் மன ஆரோக்கியத்தில் பெரிய மாற்றத்தை ஏற்படுத்தும் என்று மருத்துவ நிபுணர்கள் தெரிவிக்கின்றனர்.
தினமும் குறைந்த நேரம் நடந்தாலும், அது நீண்டகால ஆரோக்கியத்திற்கு மிகவும் பயனுள்ளதாக இருக்கும் என கூறப்படுகிறது. குறிப்பாக 20 நாட்கள் தொடர்ச்சியாக நடைப்பயிற்சி மேற்கொண்டால் உடலில் கணிசமான மாற்றங்கள் ஏற்படும் என நிபுணர்கள் விளக்குகின்றனர்.
இதய ஆரோக்கியத்தில் முன்னேற்றம்: தினமும் 10 நிமிடங்கள் வேகமாக நடப்பது இதயத்தின் இரத்த ஓட்டத்தை மேம்படுத்துகிறது. இதனால் இரத்த அழுத்தம் கட்டுப்பாட்டில் இருக்கும். தொடர்ந்து நடைப்பயிற்சி செய்வது இதய நோய் அபாயத்தை குறைக்க உதவுகிறது. மேலும் கொலஸ்ட்ரால் அளவையும் கட்டுப்படுத்தும் திறன் உள்ளது என கூறப்படுகிறது.
மனநலத்திற்கு நன்மை: நடைப்பயிற்சி உடல் ஆரோக்கியத்துடன் மனநலத்தையும் மேம்படுத்துகிறது. நடக்கும் போது உடலில் “மகிழ்ச்சி ஹார்மோன்கள்” வெளியாவதால் மனஅழுத்தம் குறைகிறது. தொடர்ந்து நடைப்பயிற்சி மேற்கொள்வோருக்கு பதட்டம் மற்றும் மனச்சோர்வு குறைவதாக நிபுணர்கள் தெரிவிக்கின்றனர். குறுகிய நேர நடைப்பயிற்சியே மனத் தெளிவு மற்றும் கவனத்தை அதிகரிக்க உதவுகிறது.
வளர்சிதை மாற்றம் அதிகரிப்பு: தினமும் 10 நிமிட நடைப்பயிற்சி கலோரிகளை எரிக்க உதவுகிறது. தொடர்ந்து 20 நாட்கள் நடைப்பயிற்சி செய்வது உடலின் வளர்சிதை மாற்ற விகிதத்தை உயர்த்துகிறது. குறிப்பாக வயிற்றுப் பகுதியில் உள்ள கொழுப்பைக் குறைக்க இது உதவியாக இருக்கும் என கூறப்படுகிறது. நீரிழிவு நோய்க்கு முந்தைய நிலை உள்ளவர்களுக்கும் நடைப்பயிற்சி மிகவும் பயனுள்ளதாக உள்ளது.
நோய் எதிர்ப்பு சக்தி மேம்பாடு: தினமும் நடப்பது இரத்த ஓட்டத்தை சீராக்கி, ஆக்ஸிஜன் விநியோகத்தை அதிகரிக்கிறது. இதனால் உடலின் நோய் எதிர்ப்பு சக்தி வலுவடைகிறது. உடற்பயிற்சியின் போது வெளிவரும் எண்டோர்பின்கள் உடலுக்கு ஆற்றல் மற்றும் நல்ல மனநிலையை வழங்குகின்றன.
தசைகள் மற்றும் உடல் வலிமை அதிகரிப்பு: தொடர்ச்சியான நடைப்பயிற்சி கால்கள், தொடைகள், முழங்கால்கள் மற்றும் இடுப்பு தசைகளை வலுப்படுத்துகிறது. இரத்த ஓட்டம் அதிகரிப்பதால் தசைகளுக்கு தேவையான ஊட்டச்சத்துகள் சரியாக கிடைக்கின்றன. இதனால் உடல் சமநிலை, உறுதி மற்றும் உடல் அமைப்பு மேம்படுகிறது.
Read more: விஜய் எனக்கு மாமனா.. மச்சானா..? தவெகவினர் காட்டியது ஏஐ வீடியோ..! – டிடிவி தினகரன் பரபர பேட்டி..
