மேற்கு வங்கத்தின் ஹவுரா மாவட்ட மருத்துவமனையில் சிகிச்சைக்காக அனுமதிக்கப்பட்டிருந்த 14 வயது சிறுமி, சி.டி. ஸ்கேன் செய்வதற்காக, ஆய்வகத்திற்கு அழைத்துச் செல்லப்பட்ட நிலையில், பலாத்காரம் செய்யப்பட்ட சம்பவம் பரபரப்பை ஏற்படுத்தியுள்ளது.
14 வயது சிறுமி தனது பெற்றோருடன் மருத்துவ மனைக்கு சிகிச்சைக்காக வந்தார். சிடி ஸ்கேன் செய்வதற்காக, ஆய்வகத்தில் ஒப்பந்த முறையில் பணிபுரிந்து வந்த தொழில்நுட்ப வல்லுநர், ஆய்வக அறைக்குள் தனியாக அழைத்து பாலியல் வன்கொடுமை செய்துள்ளார். இதனைத் தொடர்ந்து, தான் பாலியல் வன்கொடுமைக்கு ஆளாக்கப்பட்டதாக, தனது குடும்பத்தினரிடம் அந்த சிறுமி தெரிவித்துள்ளார்.
இதனையடுத்து, இந்த விவகாரம் குறித்து மருத்துவமனை நிர்வாகத்திற்கு தெரிவிக்கப்பட்டு, காவல் நிலையத்தில் புகார் அளிக்கப்பட்டது. இந்த நிலையில், குற்றம் சாட்டப்பட்டவரைக் கைது செய்த காவல்துறையினர் விசாரணை நடத்தி வருகின்றனர். மருத்துவமனையில் உள்ள பாதுகாப்புக் குறைபாடுகளையும் விசாரித்து வருகின்றனர். சிடி ஸ்கேன் அறையில் சிறுமியை பாலியல் பலாத்காரம் செய்த ஊழியர்கள் கையும் களவுமாக பிடிபட்டனர் என்று மாநில பாஜக தலைவர் அக்னிமித்ரா பால் X இல் பதிவிட்டுள்ளார்.
மேலும், இந்த பயங்கரமான சம்பவம் மேற்கு வங்கம் முழுவதும் உள்ள மருத்துவமனைகளில் பெண்களின் பாதுகாப்பின் அவல நிலையை பிரதிபலிக்கிறது. மருத்துவமனைகள் கூட பாதுகாப்பற்ற நிலையில் இருக்கும் போது, நம் மகள்கள், தாய்மார்கள் மற்றும் சகோதரிகளுக்கு எங்கு பாதுகாப்பு கிடைக்கும்? மம்தா பானர்ஜியின் அரசாங்கம் எல்லா நிலைகளிலும் பெண்களை பாதுகாக்க தவறிவிட்டது”என்று அவர் பதிவிட்டிருந்தார்.
மற்றொரு சம்பவத்தில், பிர்பூம் மாவட்டத்தில் உள்ள அரசு மருத்துவமனையில் பணியில் இருந்த செவிலியரை பாலியல் பலாத்காரம் செய்ததாக ஒருவர் கைது செய்யப்பட்டார். அதிக காய்ச்சல் காரணமாக சுகாதார நிலையத்திற்கு ஸ்ட்ரெச்சரில் கொண்டு வரப்பட்ட நபருக்கு செவிலியர் சிகிச்சை அளித்து வந்தார். பிர்பூமில் உள்ள மருத்துவமனை அதிகாரிகள் உடனடியாக காவல்துறையை தொடர்பு கொண்டனர், அவர்கள் சம்பவ இடத்திலேயே குற்றவாளியை கைது செய்தனர். இளம்பஜார் காவல் நிலையத்தில் முறையான எழுத்துப்பூர்வ புகார் அளிக்கப்பட்டு விசாரணை நடைபெற்று வருகிறது.
கொல்கத்தாவில் உள்ள ஆர்.ஜி.கார் மருத்துவமனையில் பயிற்சி மருத்துவர் கற்பழித்து கொலை செய்யப்பட்ட சம்பவத்தைத் தொடர்ந்து இந்த பின்தொடர்ச்சியான சம்பவங்கள் நடந்துள்ளன. பெண் மருத்துவர் பாலியல் வன்கொடுமை செய்யப்பட்டு, கொலை செய்யப்பட்ட வழக்கில் போராட்டங்கள் நடந்து வரும் நிலையில், மீண்டும் வேறொரு மருத்துவமனையில் பாலியல் வன்கொடுமை சம்பவம் நடந்துள்ளது அதிர்ச்சியளிப்பதாக பலரும் கருத்து தெரிவித்து வருகின்றனர்.
