உக்கிரமடைந்து வரும் போருக்கு மத்தியில் ஹமாஸ் அமைப்பினருக்கு ஆயுதங்களை வழங்கியது வட கொரியாதான் என்று வெளியான தகவலால் உலக நாடுகள் அதிர்ச்சியடைந்துள்ளன.
ஹமாஸ் கடந்த 7 ஆம் தேதி இஸ்ரேல் மீது ராக்கெட் தாக்குதல் நடத்தியது. சுமார் 30 நிமிங்களில் 7000 வரையிலான ராக்கெட்டுகளை ஏவி இஸ்ரேலை திக்குமுக்காடச் செய்தது. இஸ்ரேலின் பாதுகாப்பு கவசமான அயர்ன் டோம் திணறும் வகையில் அதிவேக தாக்குதலை நடத்தியது ஹமாஸ் அமைப்பு. இதையடுத்து பாராசூட்டுக்கள் மூலம் இஸ்ரேலுக்குள் ஊடுறுவிய ஹமாஸ் குழுவினர் கண்ணில் பட்டவர்களையெல்லாம் சுட்டு வீழ்த்தினர். குழந்தைகள் பெண்கள் என பலரையும் துப்பாக்கி முனையில் கைது செய்து சிறைபிடித்து சென்றனர். குழந்தைகளை எரித்துக்கொன்றும், ஆண்கள் மற்றும் பெண்களை கொடூரமாக தாக்கியும் தலை துண்டித்தும் கொலை செய்தனர்.
ஹமாஸ் குழுவின் இந்த செயல் உலக நாடுகளை பெரும் அதிர்ச்சியில் ஆழ்த்தியது. இதையடுத்து, போர் அறிவித்த இஸ்ரேல், ஹமாஸ் குழுவினர் தங்கியுள்ள, காசா பகுதியில் தொடர்ந்து குண்டுமழை பொழிந்து பதிலடி கொடுத்து வருகிறது. 14 வது நாளை எட்டியுள்ள இந்த போரில் இருதரப்பிலும் இதுவரை பலி எண்ணிக்கை 5 ஆயிரத்தை நெருங்கியுள்ளது. அமெரிக்கா, பிரான்ஸ், இங்கிலாந்து உள்ளிட்ட பல நாடுகள் இஸ்ரேலுக்கு ஆதரவு தெரிவித்துள்ளன. அதேநேரம், ஈரான், துருக்கி, லெபனான் உள்பட இஸ்லாமிய நாடுகள் பலவும் ஹமாஸுக்கு ஆதரவு தெரிவித்து வருகின்றனர்.
ஈரான் ஹமாஸுக்கு ஆயுத உதவி அளித்து வருவது உலகம் அறிந்த விஷயம். இந்நிலையில் ஹமாஸ் குழுவினருக்கு வேறு ஒரு நாடும் ஆயுதங்களை வழங்கியுள்ளது தெரியவந்துள்ளது. அதாவது வடகொரியா, ஹமாஸ் அமைப்புக்கு ஆயுதங்களை வழங்கியுள்ளதாக இஸ்ரேல் ராணுவம் தெரிவித்துள்ளது. ஹமாஸ் குழுவினர் நடத்திய தாக்குதலில் பயன்படுத்தப்பட்ட ஆயுதங்கள் மற்றும் அவர்களிடம் இருந்து கைப்பற்றப்பட்ட ஆயுதங்களில் இருந்த குறியீடுகளின் படி அவை வட கொரியாவிடம் இருந்து பெறப்பட்டுள்ளது உறுதி செய்யப்பட்டிருப்பதாக இஸ்ரேல் ராணுவம் தெரிவித்துள்ளது. வடகொரியா பல்வேறு நாடுகளுக்கும் ஆயுதங்களை விற்பனை செய்து வருகிறது. இந்நிலையில் பாலஸ்தீனத்திற்கு ஆதரவாக உள்ள வடகொரியா, ஹமாஸுக்கும் ஆயுதங்களை வழங்கியுள்ளது இஸ்ரேலை அதிர்ச்சியில் ஆழ்த்தியுள்ளது.
